RAH THIEHPA, MARA RAH PHOPI PADUA AWPA TA KHAZOHPA REI EIMÂ NGIAH AWPA ANGIAH. Vol- 1.

- ABIE J NOTLIA

Biehmiapa : Râh thiehpa, Mara râh phopi padua awpa ta Khazohpa rei eimâ ngiah awpa abyuh tahpa he khâpa ma a yzie châ tly? Kheita ma râh thiehpa cha eima tlô aw? Khati ta ma tlô aw pi ta, Mara râh phopi cha eima padua aw? Tahpa he hiahrina a y thei awpa a châ. Eiphana rakha ta vaw reipakawh awna ta, Khazohpa ta Marasaw zy programme rôhna kawpa, chô lâ tawhta maniah avaw taopa chiehpa, nata lâthlô mania asapa ngâhaina dâh zy eima pahno thei awpa châsala.

Mizo nata Keimo : Atlia ta tawhna khata Tlaikao na zy hry liata Evangelist thokha nata Social Activist thokha zy liata Khazohpa ta bie rei ta, 'Zoram Khawvar' he avaw pahnosa ha hra ei. Kha hlâta 'Zawlneih Saikhuma inlarna' liata ahmo hmôpa zy kha ahmeiseihpa ta atlô laih ngâhaipa hawta pahno ei ta. Anodeikua, he 'Zoram Khawvar' tlô awpa heta 'Thim thuahnih na' ama chatôh ha tua awpa angiah zie zy, 'thim thuahnihna' na liana chata Mawrah chho liata pachârôhna nata machhiesana atlô awpa zie zy reipa châ ta. Cha daihti cha atahmâ 2015 tawhna heta âthao pathaopa hawta ama reih.

Keimo Marasaw zy pi zaw khâpa eima duahmo? Apatuapalua thaipa zy pi ta cha eima pahno chyu aw. Khazohpa he ta Mara râh, Mara chi nata pho kyh apachâ zie hi. Missionary eihrâhpa, Ryureina eihrâhpa, Alphabet eihrâhpa, Râh eihrâhpa mania avaw pie khai ha chamw! Tlaikao na zy ta ama pahâh pathaopa ' Zoram Khawvar' he atahmâhlâ ta Evangelist zy khia, Social Activist nata Kha hlâta hrosopa zy ta ama reipa cha he râh thiehpa chho lâ tawh (Mara rah) tawhta athao awpa zie ama vaw reih chyu.

Tlaikao nah zy ta 'Thim thuah hnihna' ama tahpa cha Marasaw zy ta eimâ tyh thei hra awma? Khazia vâta maw? Kheita eima khôkhâh thei aw?

Ekhai, eimâ tyh thei sao tlai! Eima râh liana heta Khazohpa ta chyhsa patapa, chyhsa hmeiseihpa apeimawh habâ. Khazohpa bierei athai kawpa nata Khazohpa bie apahno pathu kawpa peimawh vei. Awnanopa hrâkuy kawpa, pakhypazi tiama kawpa peimawh khao vei. Maisâh tawhta mothlih chhao ta athyuheina areih theipa peimawh khao vei! Ato atao theipa nata palôrupa amohtuhpa eima Khazohpa heta, he Mara râh liana heta ano achi tuhpa, ano rei angiah hmeiseih tuhpa ngâlâh apeimawh. Eima pakah nata chôpho ngiana vâ ngâlâh ta Khazohpa riah achipa eima châ khia Marasaw zy pi heta Khazohpa ruchhôna he khôkhâh leipa awpi ta, Marasaw zy châta byhnâ maniah achhuady chiehpa he eima chi nata pho, eima râh pahleina chhaichhi ta ahmâh aw.

Râh thiehpa, Mara râh phopi cha kheita ma aduah thei aw?

Khazohpa ngiachhiena vâta eima râh liata change atlô ngâhai. Look East Policy he ahmeiseihpa ta ahlao avaw tloh awta. He ahlaotloh thei nawpa heta sôdaohna lâthlôh 2-lane Highway chhao KMMTTP ry liata chao ngahaipa achâ haw. He zydua avaw hlaotloh tita cha NH-54 Silchar lâthlôpi pa he aheisaipa châ awta, chho lâ aheihpa ta motota sôdaohna ama vaw siekhei bâ aw.

Daihti vaw sie via laih lymâ aw ta, Akyap, Sittwe Port rôhna kawpa, Khizaw râh nano nanopa chyhsa zy ta suto râhto tawhta ama pangaipa eima hmô hei aw. Hmo no-âh âchhi kawpa cha chô lâ tawhta Khazohpa programme nata plan taopa zy he, nothlahpa achhypa sawkhâ HAMARA SARKAR heta tlô lei awpa khiama achi tah ngâkaw awpa ta, Notla Mara râh nata Nochhi Marâ râh liata Project thiehpa atao via laih lymâ chamaw!

Achô liata eima reipa zy khie ahmeiseihpa ta hlao avaw tloh tita cha eima khoh ma, khoh vei ma avaw pua tuachai awpa cha Phura Road he 2-Lane Highway ta taopa avaw châ bâ aw! Latytlâpi liana khita Airport pha kawpa a y cheingei nata hnabeiseihpa achâ hra. KMMHP he vaw pitlo awta, Power & Electricity liata thata hmasiena eima hnei hra aw. Hmo totie zydua he eima râh tawhta hmasiena avaw thao ha bâ aw ta, Mara râh leilô hneirôna zydua chhao he thaoh papupa avaw châ bâ aw.

Khi zydua tlô awpa khita Khazohpa ta atliata tawhna khata Marasaw zy byhna maniah pie ta, Marasaw zy hry tawhta châthaipa MCS,MPS, etc zy maniah avaw pie laih lymâ. Khi nazy khi he daihti phapa eima tlô tita Maraland ku vaih awpa ta Khazohpa ta apachhhuapanoh chhieliepa zy ama châ... Aly achhi hmeiseih.

Amen... Anodeikua Khazohpa china nata reingiana hmeiseihpa he hnei chyu suh vy. Khazohpa ta Zawna kha thatihpha chho awpa ta tuah ta. Anodeikua, Khazohpa ta atuana râh lâ sie khao leipa ta, ano khona lâ asie daihti liata cha Balyh liata kiahpa ta, thlihpipa nata vâsua ru ngaitapa ta aphyh khaw. Balyh liata kiahpa zy ama no raih ta. Achhâ chhâna liata cha Zawna kha apahnothai pata, 'keima vâta na a châ. Keima he tilaipi lâ na thy ula' tahpa ta Zawna tilaipi la ama thy tawhta thlihpipa nata vasua avaw chalih. Ti liata thypa acha tawhta ngasa ta apalâ hei khaw! Noh 7 na nohta apachhao papua.

Atanoh he Khazohpa ta mania akhokheina dah zy apyh thai leipa ta, eima kuh eima pachhasa khiata cha he râh he hnôchhypa eima châ aw. Chavâta Khazohpa rei angiah ei sila, Khazohpa china hmeiseihpa hnei chyu suh vy.