Ahmawh y vei

- By Rev Dr Laiu Fachhai

Hlâno Mara râh liata “ahmawh” ama tahpa chyhsazy za y ei ta. Ahmawhzy cha chyhsa tyhpa hawhta za pachâ leipa ei ta, chyhsa pathaih leipa, châhrasala chyhsa a pasasa theipa nata a thie chhao taihta a thie theipa hmotaotheina ahneipa hawhta ama pachâ. Chavâta, chysa tyhpa â tahpazy ta ahmawhzy cha za chi kaw tyh ei ta, â hao chhao a hao ei ta, ama za pathlua kaw tyh. Chyhsa tyhpa nata pathaihpazy châta cha lapinô nata vahpa châta hnei awpa chi ta za rao veih ei.

Aahmawh kyh liata hlâno Marapasawzy ta hehawhta ama za pachâ: Thazâh, chaihrai, thohna nata hmobyuh hropazy hmâ leipa ta palôh phaozie tawhta chyhsa a pasasa theipa (a patlâhleisa theipa) nata a thie chhao taihta a thie theipa. Ahmawh ama tahpazy cha ta ama palôh a pasasapazy; ama palôh a patlâh leipazy; chysia nata hmo ama kho kawpazy hiah ei sa la a pie khoh leipazy; chysia, sahroh nata hmo ama uahva kawpa ahneipazy nata satlia laihsa ama hiatlia kawpazy ama “sie” (pasasa) thei na, tahpa ta ama zâ ngiapâ.

Ahmawh ama tahpazy ama vaw puana chhâpa phôhpa sâkha ta hehawhta a rei. Khizaw zydua tipa-ua ta a vao khai hawna daihti liana kha chyhsa, pazu pavaw nata sa to zydua tlâh a sâh chaipa buchadoh tlâh lâ kiah khai ei ta, chapaw hawti harapa pakha cha chakeih keihpi ta chhy ta, cha chakeih sâhpi apazypa pathlazy cha ahmawh lâta ama pua haw. Chhâzaw râh lâ maniah a siesai hawpa ei paw kha ta cha he phôhpa he zo tiah-râh vei. Hlâno abei chhiepazy ta amâ hao kawpa ama khisaw râhsawzy a chhie thei chaipa hawhta ama moh ama pachhie khona tawhta a vaw puapa châ sala a pangiasa.

He rohtuhpa chhao he Middle siku ei kia daihti liata ahmawh ta a sie hawpa hawhta pachâpa ei châ. Achhâpa cha ei chasipa thata a sâh tyh ta, ei palôh chhao siano khao tyh leipa ta, ei rei chakhyh pâ ngâ kaw tyhpa vâta. Châhrasala, ei pasana kha ahmawh vâta vaw châ hlei leipa ta, malaria PF vâta vaw châ ta, malaria thohna ta thata mohhôhpa ei châ tawhta, Khazohpa baona ta ei vaw tlâh haw. Chavâta, he ei hrotyhpa tawhta nata achuna a sâh viapazy ei chu laihna zawhzi nata chakaona liata ei ngiana zawhzi ta Marapasawzy ta ahmawh eima tahpa he a y thai nahta pangiasa leina lai ngaitapa ei hnei tawhta a rei kaw bâ. Â thu viapa ta eima rei hlâta, ahmawh a y thai nahta ei pangiasa leina chhâpa sâkha cha he he a châ: Liah (Lai)-nah nata Mara-nah he ahmawh a pa-ysapa châ pi ta, Maw-nah ta ahmawh hnei veih ei. Chavâta Marapa nata Liahpazy ta ahmawh hawhta ama pachâpazy Maw râh lâ amâ paih khiahta la ahmawh châ khao leipa ei ta, chyhsa tyhpa ama châ lymâ.

India Maw Nochhi râh thokha liata thlahpa chhiepa ahneipa, Mongyuh reih ta witchcraft ama tahpa, a ypa hawhta a ngiapâpa ama y hra. He thlahpa chhiepa ahneipazy he Marapa ta ahmawh eima pachâ dâh hawhta chyhsa pasasa thei ta, ama thie theipa hawhta amâ ngiapâ hra. Chavâta thlahpa chhiepa ahneipa hawhta ama pachâpazy cha a thie chhao ama thie pâ ngâ kaw tyh. Su thokha liata cha ahyzy tlyma ta hmo kheihhawhpa vâta ama chhyh thai leipa nata amâ hao kawpazy nata ama duasu a kaw chhu thei awpa ta ama pachâpazy kha thlahpa chhiepa ahneipa na ama châ, a tlia liata athipa chhao kha âmo na a thie ei, tahpazy ta bie do leipa tao ei ta, zawpi ta thlahpa chhiepa ahneipa hawhta baipazy chô liata ku pathlapa ta, a thie chhao ama thie hawpa kyh rei awpa a y chili. Africa râh thokha liata chhaota chyhsa mo saihpa, ahripa mo (red eye or evil eye) ahneipa, chyhsa a pasasa theipa, a thie chhao a thie theipa hawhta ama pachâpa ama y hra. Ghana râh liata chhochhi cha chanô ama nôpi, ama hah tlao baih tlao tawhta la thlahpa chhiepa ahneipa (witchcraft) lâta na amâ lie haw tyh ama tah. Hehawhta thlahpa chhiepa ahneipa hawhta abaipa nata chyhsa mo saihpa hawhta abaipazy he ama yna râh sawhkhâzy ta pasaih veih ei. Chahawhpa hmo a y thai awpa ta ama pachâ lei tho ta, ama râhsawzy chyhsa ama châna tovyuh (human right) paraopa a châ awpa vâta. A baituhpazy dâh hawhta hrie theipa ama châ.

Thlahpa chhiepa ahneipa nata mo saihpa hawhta pachâpazy he Marapa ta ahmawh eima pachâ dâh nahta a lyu veih ei. Thlahpa chhiepa ahneipa nata mo saihpazy he cha a chi ta a pathlapa, pikheipa châ leipa ei ta, vaw y ta, a lei heih theipa hawhta pachâpa châ ei ta, Marapa ahmawh deikua cha a chi ta a pathla pachhuah laihpa, pikheipa, a lei thai khao lei awpa hawhta pachâpa a châ. Chyhsa pathaihpa chhao a lapinô tlyma, â vahpa tlyma ahmawh a châ khiahta cha ano chhao ahmawh lâta â lie ha hra aw na, tahpa pachâna chhao a y hra. Chyhsa pasasa thei ta, a thie theipa thlahpa chhiepa ahneipa, mo saihpa nata ahmawh zy chôchâh liata, ama zydua heta science lâ tawhta nata Khazohpa bie lâ tawhta saipa ta, zo a chhih leipa, hmo a y thai leipa ama châ. Biehrai liata hehawhpa lâ chhâh he hmô awpa y vei. Biehrai ta thlahpa chhiepa ta a patu hawpazy (Mathai 4:24; Zawhana 10:19-21; etc) kyh areipa he cha, chyhsa a pasasa theipa nata a thie theipa châ leipa ei ta, âmo palie kha thlahpa chhiepa pabuana vâta riethei ataopazy tlao ama châ hri.

Ahmawh he a y hmeihseipa ta a châ khiahta cha tlao khâsia lâlao ta, Marapa chariahzy pasiesa ha chhyhpa ta ama phahnai kaw aw. Châhrasala, chahawhta hmâ thai awpa châ veih ei, ahmawh y leipa ta, ahmawh ama châ leipa vâta. Atanoh ta eima râh liata tlâh leina nanopa nata thinazy he ahmawh vâta châ leipa ei ta, hri nata iahzy vâta tlao ama châ hri. Chavâta khichha lâta thohna athaipa (pachao-pamâpa ahmâhpa) zy kaw la ngâ kaw hra sih la, patlâh thei hlei aw veih ei. Khazohpa hrohpa lâta thlahchhana chôta, dawhtyzy ta mohhôhna dopa nata phapa nata thohna dopa nata phapazy ama pie awpa a peimawh chai.

Hnatlâna phapa eima hnei thei nawpa ta raihria nata niedo dâh thai ta, kuvâ, chahnamei, karao, khainie, sâdâ, sahhma, drug, etc zy tao leipa ta eima y awpa a peimawh kaw. Eima pôhpa, olyu nata chheipâh a pathaih awpa byuh ta, thlohhmia ta maniah a sie lei nawpa ta thlohmia sao hmâ awpa peimawh ta, eima tlâh lei tita thohna o thlai ta ngai ha tyh awpa â ngiah. Chahawhta tao leipa vâta, chieh lei tlâh leina a la tita, ahmawh bai thlah hapa cha khatlu ta thohna athaipa ta hmâhta cha “ahmawh” cha papua thei aw veih ei. Palôh a ki leina chhao ahmawh vâta châ leipa ta, chieh leina khiakhipa naa achhâpa hropazy vâta tlao a châ hri.

Khazohpa ta ano a lyu kakuapa ta a tao hrapa, Khazohpa ta kyh a pachâ ngaitapa, eima chyhsa châ lâhpazy, eima khih kha râh kha nata chi kha hrâ kha châ lâhpazy, eima awnanopa châ lâhpazy “ahmawh” tahpa ta pathlua sih la, ama hmia zy pachhie sih la, kuzy eima pathla thlu khiahta cha Khazohpa palôh tlâh aw vei. Saw chhâ nawh chhâ châ chhaota pha aw vei. Sawhkhâ chhaota kho leipa aw ta, dâh hawhta hriena eimâ tyh thei hra. Thlahpa chhiepa ahneipa, chyhsa mo saihpa, ahmawh tahpazy he Krizy hlâta ngiapâna do leipa nata pahnona do leipazy tawhta a vaw puapa châ ta, atanoh Krizyhpa Marapasawzy ta cha ngiapâna pitlohna lâ pangaipa ta, ahmawh pa-ysapa pachâna do leipa nata ngiapâna do leipazy he lai sai â daih haw bâ.

(He Article he kô 2014 liata ropa a châ.Admin)