HACHIKO : THINA TAIHTA A PUHPA CHÂTA I NGÂCHHIHPA
Japan chyhsa ta atanoh taihta ngâchhihna a pachuna châta ama hmâpa cha I, a puhpa châta thina taihta ngâ a chhihpa Hachiko ama tahpa, a film taihta ama tao pâ ngâkawpa cha a châ.
Hachiko he Phiapi/November noh 10, 1923 khata Japan râh liata Olate City liata Akita Perfecture ama tahpa su liata vaw pih ta. Kô 1924 khata Hidesaburo Ueno-liata, University of Tokyo liata agriculture professor ta â la ta. Hachiko he i chi kha, 'Akita breed, buhchâh rôh, a hmia cream róh lâchhâh hmi a phaohpa a châ. Hachiko nata a puhpa he â tlaichhai kaw ei ta. A puhpa a rai lâ tawhta ãvaw dipa he nohchareih Shibuya rail station liata avaw hâ ngâthlâh ha tyh.
Kô 1925 Patô/May thla liana khata nohkha cha a puhpa cha â vaw dipa hmi rai hmô awpa y khao leipa ta. A puhpa, Professor Ueno cha a lathli liata thari chiepa, 'cerebral hemohrage' vâta a thi hapa he vaw châ ta. A puhpa cha chhâzaw cháta hâ papua awpa y khao vei.
Cha hawhta a puhpa ta vâduana a tyhpa ta a hrona taihta a pahleipa cha ano, Hachiko, I châta cha pahnothai rimâ awpa rai châ vei. Nohchareih heta a puhpa a hâna su tyhpa liana chata a puhpa hmi hmô a hnabeiseihpa ta khâ avaw hâ ngâthlâh haw.
Cha su liata rail vaw tlô tyhpa cha daihti bitaipa hneipa ta pua tyhpa nata vaw tlô tyhpa a châpa vâta, cha su liata ahlaihlâpa chyhsazy chata Hachiko ta a puhpa mokháhpa ta khá a hâ tyhpa cha hmô ngáthlâh ha tyh ei ta, nie awpa khâpa zy tlyma chhao ama pie tyh hra. Cha hawhna chata a puhpa, a hmi hmô awpa nata hâ papua awpa a y khao leipa cha cha I ngãchhih kawpa, Hachiko chata kô 9 tlai ngâchhih kawpa ta avaw hâ hnolo tyhpa a châ. "Ei puhpa he â vaw di khao leipa na a châ aw," tahpa ta hnabeidy rai a chhuah vei. Ngâchhih kawpa ta a daihti tyhpa, a hâna su ualuapa liata kô 9 chhôh cha a puhpa cha avaw hâ hnolo ngáthlâh hapa a châ.
Kô 1925, Professor Ueno thina kô heta a pachu tyhpa pakha, I lâta paháh kawpa hrapa chata Hachiko he Shibuya station tawhna chata pazi lymâ ta, Professor Ueno sahdô mohôhtuhpa, Kikuzaboro Kobayashi O liata I chata â ngiakhei ta, a thátih a pahno baichhi via lymâ. Chatawhta, athata alaichadaipa ta, Japan liata Akita i hawhpa he 30 rachhôh ngâlâh a y bâ, tahpa a hmópapua. Cha tawh cha Hachiko thâtih cha thâtihbu liatazy châpaw (article) ta roh ta, 1932 liana khata Tokyo Asahi Shimbun thâtihbu liata papua ta. He tawhna heta Hachiko thátih cha âvaw lâluah hapa a châ.
Pamih/March noh 8, 1935 khata he I ngãchhih kawpa he Shibuya khihliah liata thi chiehpa ta a huapa châ ta, a ri he athaisopazy ta mohpasiapâ ha ei ta, terminal cancer pasana a hnei tahpa nata chhôhchhie, filaria infection a hnei tahpa ama hmópapua.
Hachiko nohthlahvipa (statue) cha dawh ta tao ei ta, Shibuya liata sopa châ ta, châhrasala, adyuhpi ei 2-na liana khata a nohthlahvipa cha adyuhna chhaichhi taona châta hmâps châ ta. Hachiko ri cha a vo pahluhpa ta pala hnaohpa ta, National Science Museum of Japan liata sopa châ ta. Thlahzoh/August 1948 khata Hachiko nohthlahvipa taotuhps sawchapaw ta a nohthlahvipa hropa tao heihpa ta, Shibuya station a ngiana thaby liata sopa châ ta, he su he Hachiko Guchi tah ei ta, a yzie cha Hachiko chhikao tahna a châ.
He su he chyhsa ahmaohpakhyna su chaipa châ ta. He hleikhóna heta a puhpa avaw dy tyhna su liata a pheihnie dawh ta tao ei ta, a kiahpâh liana chata Hachiko thátih ama rohpâ hra. He hleikhôta a pihna khih Olate City-liata chhao a nohthlahvipa ama soh hra.
Kôchareihta Patô/April noh 8 liata ano atheithlâhna daihti hmâh tyhpa châ ta. Japanese zy heta pasâhsa ei ta, ngâchhihna a pachuna cháta ama hmáh tyh. He I, Hachiko, thina taihta a puhpa cháta ngâchhihpa he y khao hra vei sala, a ngâchhihna he khatino hmahta my beih khao aw vei ei.
