India Maw-nochhi atlyhna : BJP ta kô 25 chhôh Tripura liata ryu vaw reih hapa CPIM pahniepa ta sawhkhâna ama tao

BJP chata kô 25 chhôh tlai ‘Left Party’ ta ryureina ama vaw siekheipa pachhâsapa ta Tripura liata sawhkhâna tao ei ta; Nagaland nata Meghalaya liata deikua Party miakha ta sawhkhâna a tao theipa ama y leipa vâta ‘Ahrialâhpa sawhkhâ (Coalition)’ a pih aw.

BJP heta Tripura atlyhna liata Assembly seat 60 liata 35 lapa ta, sawhkhâna tao awpa ta manôh a ngiahpazie hneipa ta sawhkhâna tao awpa ta liahsa achhuahnoh ha ta. Ama hrialâhpa Indigenous People's Front of Tripura, (IPFT) ta Seat 8 ama vaw la ha heih hrapa vâta BJP nata ahrialâhpa heta MLA 43 hneipa ta, Tripura liata pahnie kawpa ta sawhkhâna ama tao aw, tahna a châ.

He hawhta a châ nona heta Congress ta kô 2013 Assembly atlyhna liata Seat 10 ama lapa zydua pahleipa ta, atahmâ atlyhna liana heta kuruapa ta atyuh ei ta. Kô 25 chhôh Tripura liata ryureituhpa CPI (M) ta kô 2013 liata Seat 48 ama lapa tawhta Seat 16 ngâlâh ama pabohsa. India râh liata CM riethei chaipa, Tripura Chief Minister Manik Sarkar deikua Dhanpur bia tawhta a tloh heih.

Tripura Assembly atlyhna liana heta Seat 60 atlyh awpa liata Charilam bia liata aduah awpa candidate pakha a thipa vâta Seat 59 liata atlyhna he hneipa châ ta. Assembly Seat 60 liata Seat 20 he Scheduled Tribe châta sopa châpa ta, seat 10 he Scheduled Caste châta sopa a châ.

CPIM heta chipho chyhnawhpa, ST châta sopa seat 20 pabohsa thei khao vei ei, tahpa â lâpasia kaw ta. BJP-IPFT ahrialâhpa heta Tribal seat 20 tawhta seat 13 ama la.

BJP Tripura state President Biplab Kumar Deb cha Banamalipur bia tawhta tlohpa ta, ano a kaw hnia chaituhpa Amal Chakraborty cha Vote 9,500 hlei ta a pahnie.

Chief Minister parohpa Manik Sarkar cha Dhanpur tawhta tlohpa ta, State PWD Minister nata CPIM candidate Badal Choudhary chhao Hrishyamukh bia tawhta a tloh hra. He hawhta a châ nona heta, CPIM candidate nata Agriculture Minister Aghore Deb Barma deikua â duana bia Asharambari liata tloh vei. BJP heta târi 10, Pamihpa liata cha sawhkhâna thiehpa ama tao hmâ na ta amâ hnabeiseihnazie ama reih ha hra.

Tripura liata BJP nata ahrialâhpazy ta pahnie kawpa ta sawhkhâna ama tao awpa nota, Meghalaya nata Nagaland liata deikua Party sâkha ta sawhkhâna tao thei awpa ama y leipa vâta, sawhkhâna tao awpa ta achatôhna ziza â sâh kaw aw.

Meghalaya atlyhna liana khata Congress cha Party sâkha ta seat la hluh chaipa châpa ra Seat 60 liata seat 21 la ei ta; National Peoples Party ta Seat 19, United Democratic Party 6, People's Democratic Front 4, Independent 3, BJP nata Hill State People's Democratic Party 2 rairie, NCP nata KHNAM rairie ama la. Chief Minister Mukul Sangma ta a bia Ampati a pabohsa hleikhôta Songsak bia tawhta a tloh hra.

Nagaland liata cha Election Commission of India ta a palâsana dâh ta, BJP nata ahrialâhpa National Democratic Progressive Party zy ta seat 28 la ei ta. Anodeikua, Naga Peoples Front Party cha party sâkha ta seat la hluh chaipa châpa ta, seat 27 ama la. National Peoples Party ta seat 2 la ta, JD(U) nata Independent ta sâkha rairie ama la hra. 

   

Chief Minister nata NPF candidate T R Zeliang cha Peren bia tawhta tlohpa ta, â kholâhpa NDPP candidate Iherie Ndang a pahnie. NDPP Chief Neiphiu Rio deikua Northern Angami-II bia tawhta achhutuhpa y leipa ta avaw tloh hapa kha châ ta. Nagaland Chief Minister parohpa K.L.Chishi, BJP candidate deikua Atoizu bia liata tloh vei.

He India Maw-nochhi state mia 3-pazy heta seat 60-hnei chyu ei ta, anodeikua seat 59 liata atlyhna he hneipa a châ chyu. Tripura liata Charilam bia (ST seat) cha CPIM Candidate Ramendra Narayan Debbarma a thipa vâta atahmâ thlâpâ 12 liata atlyhna hnei awpa ta pasiepa châ ta. Meghalaya liata chhao Williamnagar liata IED Bomb-papa liata NCP candidate Jonathone N Sangma cha a thipa vâta atlyhna hneipa châ hra vei.

Tripura liana heta CPIM sawhkhâ parei tu hapa aina vâta zawpi heta sawhkhâna ama thla, tah thei awpa a châ nota, CPIM heta Vote Share deikua ama hnei pha kaw. Zakha liata 45 Vote share he hnei ei ta; BJP heta chipho chyhnawhpazy tawhta Vote ama hmô pha kaw. Tripura Assembly seat 60 liata Seat 30-zy he chipho chyhnawhpa – ST nata SC châta sopa (reserved)-pa a châ.

He hawhta a châ nota, Krizyhpa hluhna State – Meghalaya nata Nagaland liata deikua BJP he tla pasa tu mâh leipa ta, Nagaland liata cha amâ hrialâhpa zawzi ta BJP moh he â kaw lâ hrapa deita châpa ta, Meghalaya liata chhochhi cha Central liata sawhkhâ haipa hmahta châ hr’eisala, Seat 2 deita ama la thei. He State mianopa – Meghalaya nata Nagaland liana heta Central sawhkhâ thatlôna hmâpa ta sawhkhâna deikua ama tao thei pyly hra.