MADC CHAIRMAN’s TROPHY 2018 FINAL : Kahrie FC pahniena topa heta Mararâh Football hmahsiena kyh liata ahrapathina a tlôkhei cheingei aw!

Siaha khihpi ta Football ataopasuana nano nanopa avaw hmiachhy hapa liata, District hropa Lawngtlai tawhta zy, Bualpui NG, Lungzarhtum nata team chhiepa a châ beih leipa, Assam Rifles-tawhtazy Siaha khihchhôh team-zy pahlaw achhuahpa ta DC’s Trophy daihti no tawhta thapi phiapa ta nyungiapa a dikhei amâ chhuah tyh. Châhrasala, a dikhei lilâ thei vei ei.

Siaha local football â nano kaw hrana cha, Tournament châhki ta khichhai lâ tawhta vaw puapazy ta Final, Semi Final ama vaw tlô hapa chhaota, Champion nyungiapa ngâsâ la chalo thei beih vei ei. Siaha khihpi khôtho lâ, District hropa tawhta rei leipa ta Siaha khihpi liata khih hropa nyungiapa a chalo theipa cha Chapi châ ei ta, âmo heta sânona nyungiapa ama vaw chalo ha. Châhrasala, Champion nyungiapa ngâsâ la chalo thei pyly vei ei.

Atliata tawhta Mararâh Football ziza avaw nano lymâpa ta, Siaha District Football Association-zy hriapasana zawzi ta Football ta Siaha khih khôtho lâ tawhta Siaha khihpi miah a siehnao pathao haw.

Zâhnia ta MADC Chairman’s Trophy Final mopha kawpa ta, Siaha Local Football liata team chhiepa a châ leipa nata Final ama tlôna lâthlôh liata team pha chaipa ta pachâpazy vaw pahnietuhpa, New Colony United FC cha khichhai team, Kahrie FC ta 3-2 ta pahniepa ta, Mararâh Football History ama tao haw!

Kahrie FC heta kheita ma pahniena ama to, tahpa nata ahyzy ta goal khô ei?tahpa hlâta peimawh viapa cha, Kahrie FC pahniena topa heta Mararâh Football liata ahrana thiehpa a tlôkhei aw, tahpa he a châ.

Khahlâ tawhta Siaha khihpi liata Football ataopasuana a yna châhki ta zawpi pachâna liata a y tyhpa cha, “Thotlâh lâ tawhta vaw puapazy he la, Quarterfinals nata Semi Finals ama tlôpa chhaota, a ziza ama ngâh tyh leipa vâta Champion thei pyly vei ei” tahpa a châ tyh.

He heta thotlâh team zy palôh liata chi a tu hapa ma a châ ma, ama reipa hawhna tlai heta a ki ama kaw tlô chyta liata ama lahmei am any ha heih tyh. He pachâna he Kahrie FC ta vaw phiepa ta, Nyungiapa cha ama khih lâ amâ dikhei haw!

Kahrie FC thâtih heta Mararâh khih nano nanopa tha pathyu aw ta, he heta a phana lâta Mararâh Football liata ahrapathina a tlôkhei cheingei na ta hnabeiseih â chhih kaw!