ISL 2017/18 Final : Chennaiyin FC ta Champion awpa ta pangiasa chaipa Bengaluru FC 3-2 ta pahniepa ta a ei 2 n’awpa ta ISL nyungiapa ama chalo

Chennaiyin FC ta ama Season eikhana liata nyungiapa chalo achhuahtuhpa Bengaluru FC cha 3-2 ta pahniepa ta,  a ei no n’awpa ta Indian Super League (ISL) nyungiapa ama chalo ha heih.

Chennaiyin FC châta si no khôtuhpa Brazilian Mailson Alves cha Final liata Player a lâluah chaipa châpa ta, Chennaiyin FC tlôna tôhpipa eima tah thei aw.

Mailson heta a goal khana he minute 17-na liata khôpa ta, he heta BFC châta Sunil Chhetri ta minute 9-na liata a khôpa cha vaw phiepa ta, Mailson pyly heta Chennaiyin FC hmia asahna he minute 45-na liata a za khô heih hra.

Minute 67-na liata Bengaluru FC pachârôhna baichha via awpa ta Chennaiyin FC lâ tawhta Brazilian pyly Raphael Augusto ta za khô heihpa ta, 3-1 ta hmia asah ei ta, Sree Kanteerava Stadium liata pyury a hnei pha kawpa BFC fans-zy ziazi ama roh thlâh ha bâ.

Miku ta daihti piechhipa liata Bengaluru FC châta za khô heih taraw hrasala, yzie hnei muarua khao vei. Daihti chhâ ta, Chennaiyin FC cha ISL Season 4 liata Champion ama châ haw!