MADC Chairman’s Trophy 2018 Semi Finals : Kahrie FC (Mawhro) ta Final liata New Colony United FC ama pahnie thei ma?

MADC Chairman’s Trophy 2018, Siaha Vaihpi Tlyliah liata akhaih haipa cha atanoh khata Semi Finals akhaihpa châpa ta, Champion awpa ta pangiasapa rairie, New Colony Unted FC nata FC College Vaih akhaihna liata New Colony United FC ta 3-2 ta pahniena topa ta Final amâ ngia. Semi Finals ei nona liata Kahrie FC ta Amohbyuh Vaihthieh FC cha 3-2 pyly ta pahniepa ta Final ama ngia hra.

‘Derby’ tah thei awpa, Siaha liata vaih â opapa, New Colony United FC nata FC College Vaih-zy he a pahniethai kaw ei ta. Siaha liata Coach phapa pano, Ng Beirôna, (FCCV) nata S.Thahlu (NUFC)-zy lathli ta adyuhna pipaw kawpa eima hmô. Amâ khaihna dâh a kho kaw ta, Goal chance chhao ama hneina dâh â kho rairie kaw, châhrasala, goal khô hluh viapa he tlô viapa ama châ ha tyhpa hnaihta, daihti chhâ ta, NUFC ta pahniena topa ta, Final amâ ngia hapa a châ.

NUFC châta goal khôtuhpazy he Joseph Lalruatdika, Alray Hlychho nata A.Beihrokhai-zy châ ei ta; FCCV châta goal 2-pazy he Khawpuimawia ta a khôpa sai a châ.

Semi Finals akhaihna hropa liata khichhai team rairie, Kahrie FC (Mawhro) nata Amôhbyuh Vaihthieh FC akhaihpa ta, Kahrie FC ta si phao tuapa ta amâ chadai tawhta, Amôhbyuh Vaihthieh FC he paliepatheipa ta, 3-2 pyly ta pahniena ama to.

Amôhbyuh Vaihthieh FC châta goal khôtuhpazy he KC Daniel, Lalhmingchhuanpuia zy châ ei ta; Kahrie FC lâ tawhta goal 3-pazy heBeipazi, TP Vahne nata K.Vabeidaosa-zy ta ama khôpa a châ.

Târi 17, Pamih 2018 zâlâ dawh 1-pa liata Final akhaihpa châ aw ta. Siaha khihpi Club phapa, New Colony United FC ta, Mararâh nochhi team phapa, Kahrie FC ama pahnie thei ma? Kahrie FC heta Siaha Local Football liata khichhai ama châna mypa ta Nyungiapa ama chalo thei ma? Moh byuh â chhih ngaita kaw bâ!