Mara reih he Mara Identity pabohsatuhpa thatlô chaipa a châ

- By Rev.Laiu Fachhai

Marapazy he eimâ lâ dâh liata eima chheipâh chi hropa Mizopa nata Laipa nata chi hropazy nahta eimâ nanona y vei. Eima hmia pizie a lyu ta, eimâ tobizie chhao a lyu thlâh ha bâ ta, eima phoryhpa (culture) chhao, Sawlakia tah ta âmo lâh thai via ha bâ ei, chyna chylyu pohzy a sai ei ta a ngiakhei kaw ei, âmo chipho chysia khiah maw tah awpa lyu thlâh ha bâ.

Chavâta Mara Identity eima pabohsa khoh khiah cha eima pabohsa theina a y chhôhpa la, Sawlakia he Mara lâ na a châ tahpa tlyma, Chylyu poh he Mara origin na a châ tahpa tlymazy hlâta, "Marapazy cha Mara reih ama cheih" tahpa he a châ. Mara reih eima cheipa liata Marapa eima châna â lâ aw.

Hnokawpa a saipa ta, Sawlakia a tlai ngasapa ta kiah thai hra la, Mara reih na thai vei khiata nata, na chei khoh vei khiata cha, na Mara châna a lâ hlei aw vei. Â lâ lei cha rei lei ta, na Mara Identity na pahlei ngâ kaw tahna a châ.

Mara reih a y khao vei tita la Mara Identity chhao a lei pâ ha aw.

He vâna tlai heta kei la Mara reih he chei lyh-lia ei chhuah.