WORLD WATER DAY : Khizaw ta ti pathaihpa â phahla via lymâ ha bâ

Atakô he World Water Day ta kô 25 a tlohna avaw châ ha bâ heih hra. A leipa ta eima y thei leipa, ti sôh lymâpa deikua ta khizaw nô a papo via ngâkaw.

Atanoh (Pakhy noh) he World Water Day châ ta, ti pathaihpa, khizaw cháta a peimawhzie nata ti he khizaw sie lymâ n'awpa châta hmo peimawhpa nata angiah hialiapa a chânazie apachuna noh cháta hmâ tyhpa a châ.

Ti peimawhzie eimâ pachu nona heta, khizaw chyhsa 2.1 billion zy cha ama O liata ti pathaihpa nie awpa hnei leipa ta y hai ei ta; he heta ama hnatlâna, achuna nata khihsana taihta a pabua hai. Ti sôhpa heta khizaw râhhlypi (Continent) zydua châta rairuna tlôkhei hai ta, United Nations Department of Economic and Social Affairs ta amâ chupasiana liata cha khizaw chyhsa 1.02 billion, khizaw maluh supangawh pachhaih ta sukha daihmâzy cha ti rairuna hmeiseihpa liata y hai ei ta.

Maluh 1.6 billion zy ta _economic water shortage_ (Ti la awpa ta chhaichhi/hmobaoh a phahlana) duasu liata amâ duah hai.

Ti sóh lymâpa he chyhsapa ta a patlôsapa a châ raohpa ta, leilô ytuzie vâta a sôhpa a chhao a chã hra.

Chyhsa hluhpi ta ti sôhna chhâpa he, eima yna alei (Earth) liata ti a chyhpa vâta a châpa hawhta ama bai nota, UN ta a reina dâh liata cha khizaw liana heta chyhsa 7 billion châta ti pathaihpa nie awpa y ta; châhrasala ti arairuahna alyucho leipa vâta nata eima papua paleipa vâta zy, a lila leipa liata eima hmâh chakhyh tu hapa vâta zy nata  tihnawh pabohsana cháh eima pahno leipa váta zy ti pathaih he sóh via lymâ ta, South Africa liata Cape Town khihpi chhochhi cha ama duasu a chhie kaw, ama ta.

Kô 2025 liata cha, chyhsa 1.8 billion zy cha ti pathaihpa nie awpa a sôh pachaihna su liata pahrâ aw ei ta, khizaw maluh suthôh liata suno zy chhochhi cha ti pathaihpa nie awpa a phahlapa ta ama y ha bâ aw, tahpa palásapa a châ hra.

Atahmâ hawhta nohkhih yzie â nano lymã khiahta cha, Africa liata chyhsa 75-250 million maluh â hlaopa ta kô 2030 liata cha khizaw chyhsa maluh khophie he cha ti pathaihpa eimâ phahla pasa kaw bâ aw. He hleikhôta, ti sôhpa váta chyhsa 24 million tawhta 700 million taih zy cha ama pahrâna su ama puasai awpa â ngiah thei na ta reipatipa ama chã.

Sub-Saharan Africa rachhôh he khizaw liata ti sóh chaina su zy a châ hra.

Eima râh, Mararáh chhao he, atahmâ hawhta ti hmâh chakhyhpa ta nata tihnawh pabohsa leipa ta, eima râhhmâhpazy eima parao lymâ khiahta la, eima duasu he a chhie via lymâ thei.

Sâlâ kawpa hawhta, eima hawti nota chavah lai kawpazy kha, atahmâ cha chavah chyhnawhpa hawhta châ ha bâ ei ta; eima hawti nota eima ngai eimã sina tyhpa nata ti eimâ zawna tyhpa, chavah thokha chhochhi cha ama kua ha bâ.

Atahmâ tawhta Tihnawh pabohsapa ta, pachhana rai eima hria via lymâ awpa â ngiah liahsa haw!!