Aizawl Mara Church ta Pinô Vaili kô 80-tlohna alykhei
Zâhnia târi 16.04.2018, Pinô Vaili pinoh avaw tlôpa cha Aizawl Mara Church (AMC) ta a yna Aizawl Civil Hospital, New Cabin Room No. 202 liata alykheina a hnei.
He daihti lia heta Evangelical Church of Maraland, Hqrs tawta Senior Executive Secretary, Rev. Dr. Laiu Fachhai ta a pinanoh alykheina biereina nata pawpi hlana ECM, Hqtrs vyupa ta hnei ta. Aizawl Mara Church, Pastor bia vyuhpata Rev. K. Laichhua Azyu ta pawpi hlâna nata alykheina bie ahla hra. Macha S. Pa-aw, Awnano Hyutuhpa, Aizawl Mara Church ta thlachhâna ta Pinô Vaili pinanoh alykheina daihti cha a pachhasa.
He daihti alychhi kawpa ahmana liana heta Aizawl Mara Church ta Pinô Vaili pinoh alykheina chata Birthday Cake pahahkawpa nata laikawpa taopa ta. Aizawl Marasaw avaw lykheituhpa zydua ta ama nie hleikhôta, Aizawl Civil Hospital, New Cabin liata atlâhleipa a ypa zydua nata a ypatuhpa zydua, New Cabin ry - Cardiology Ward liata atlaleipazy nata a ypatuhpa zydua hleikhôta Cardiology Department liata atlahleipa avaw pamosapa zydua, New Cabin building ry chaihpa liata X-ray room, CT Scan, etc. liata atlaleipa zydua hleikhôta Ward / Floor to liata ahriatuhpa zydua - Nurses, Technicians, Staff, etc. chhao Pinô Vaili alykheina Cake he ama nie khai hra. He hleikhô ta Aizawl Civil Hospital liata alaichaipa Dr. K.L. Remsanga, Medical Superintendent nata a Staff na zydua, Dr. John, Dy. Medical Superintendent nata a Staff na zydua chhao Birthday Cake he ama Office liata alykheina chata nie awpa ta pie hrapa ama cha.
AMC Awnano chhituhpa - Macha nata Khichhô Machazy ahlao chyu ei ta. Krizyhpa Nô Py - AMC, Krizyhpa Thyutlia Py - AMC nata *MSO Jt. Hqrs ; Aizawl chhituhpazy chhao ama kih kaw.
Pinô Vaili he Mararah liata Awnanopa zydua nata zawpi zy thlachha khei lyma na vata tlâhna la pangai lyma ta, thlai ta avaw tlah para lyma thei n'awpa ta baleita thlachha kheina rie hnei via lyma ei su.
