Korean History thiehpa : North Korea luhpa Kim Jong-un ta South Korea râhchhôh â ngia haw!

Kim Jong-un ta South Korea râh leilô tlypa ta, kô 1953 liata Korean War vâta râh miakhapazy amâ chhaih tawhta North Korean râh luhpa hryta South Korea leilô tly tua chaipa châpa ta ‘History’ a tao.

Korea râh châta ngiatlâh châ kaw awpa ta North Korea luhpa Kim Jong-un he râhri liata South Korean president Moon Jae-in ta kuchalyupa ta vaw dy ta. Kim chata, ziza a huatlâ kawpa ry liata râh nopazy ta apakyhna a nyuthu lei kawpa ama hnei aw, tahpa â hnabeiseihnazie a rei.

Thla hluh chhao a khô hlâna khata cha North Korea heta South Korea he Nuclear ta tlahnao awpa ta chyhu a sa thlu ngâpa kha châ ta, atahmâ deikua aryhna nata nuclear chaihrai taona rai chalihsana lâchhâh ama rei ha bâ aw.

He apakyhna liata reipahmaoh awpazy he khahlâta vaw rao chhielie khai hapa châ ta, anodeikua pakhâta ta vaw saituhpazy deikua ta cha North Korea ta nuclear chhaichhi taona liata hmah a lana he a pachhâsa hmeiseih ma tahpa cha hmo siahlia leipa a châ, ama vaw tah hai hra.

He hawhta pachâna nano nanopa y hrasala, Korea zawpi ta ama hâdypa nata khâ avaw mokhâhpa, North nata South Korea râh luhpa panozy ta râhri chakapa ta ku amâ chalyupa cha a râh maluhpi ta mopha tah ei ta, khizaw chhaota no-âh tahpa ta a sai hra.

Korea châta nohthiehpa a chhi

Râh luhpa panozy he South Korean pheisaih, Korean chipho atobina ta a tobipa zy ta zana vaw hlâ ei ta. He khai tawhta ama pano ta Peace House, Panmunjom, râh nopazy likah liata demilitarised zone (DMZ)-pa ama tly heih hra.

He Peace House ama tlyna liata Kim Jong-un ta bietana a ropa liana heta, "Daihti thiehpa â thao haw – Korea history thiehpa nata aryhna kô awpa cha," tahpa a roh.

He râh nopazy ziza padiana kyh liata ku nata phei chaipa, US sawhkhâ chata, he râh nopazy apakyhna heta aryhna nata phasana avaw tlôkhei aw, tahpa â hnabeiseih kaw, avaw tah hra. He Korean râh nopazy adaohna he Patô thlâpâ liata Kim Jong-un nata US President Trump-zy apakyhna vaw y awpa saichhieliena hawhta hmôpa a châ.

Khâpa ama reipahmaoh chai aw?

He apakyhna liata ama rei chai awpa cha pangiasapa hawh tlaita North Korea Nuclear Programme chôchâh châ aw ta. South Korea chata Pyongyang liata North Korea ta Nuclear chhaichhi a taopapuana su pahleipahlô awpa ta aryhna tao awpa cha a rairu kaw aw, tahpa biesakâ vaw vaw ha ta. Kô 2000 nata kô 2007 liata apakyhna ama vaw hnei tawhta atahmâ ta amâ pakyh heihpa heta Korean râh nopazy likah ziza pha lymâ awpa a pamosapa pahnopa a châ hra.

He apakyhna he kô hluhpi chhôh Korean Peninsula liata ziza dia thai leipa pachhâsa bâ awpa khona tawhta vaw puapa a châna heta theiphapa a patheisa cheingei na ta a hnabeiseihpa châ ta.

Kim Jong-un chata hâta hmiatuapa liana khata Nuclear test ama hnei awpa chhao chalihsapa ta, he he US nata South Korea chhaota a phana lâta hmo a sie lymâ awpa pamosana hawhta vaw hmô hra ei ta, he hawhta a châ nona heta, North Korea ta Nuclear  a mopachhi leina chhâpa liata Chinese Researcher zy chata ama Nuclear mopachhina awpa liata alô â khaopa vâta a châpa hawhta ama vaw reih hra.

He apakyhna liana heta Pyongyang ta nuclear taopapuana a siekhei haipa pachhâsa awpa cha biepi chaipa a châ nota, kô 1950-53 liata Korean War vâta ama likah liata aryhna a rao hapa taopathi awpazy, economic nata râh mianopazy châta peimawh awpa nano nanopazy reipahmaohpa a châ hra aw.