MADC nata NECS ta aryhna roh

SIAHA, 6 April, 2018, Pobienoh(MNN) – Zâhnia liana kha ta  MADC Nôpawpazy nata Puhpa Robert Romawia Royte, Chief Managing Director, Northeast Consultancy Services(NECS) zy ta Project hriaparaoh awpa ta paryhsana – Agreement Paper cha aly kawpa ta amâ sign.

MADC vyuhpa ta Puhpa V. Zacho, Executive Secretary a sign ta, NECS vyuhpa ta Puhpa Robert Romawia Royte ta â sign hra.

Agreement he kô 4 châta taopa châ ta, abyuhna hawh ta extent thei awpa ta paryhsapa a châ hra.

Ama hria paraoh awpazy cha ary liata palâsapa sôpipa mianozy he a châ:-

1. MADC Area liata Elementary School O nata School O liata ahniahnipa zydua sana awpa. (Education).

2. Siaha Town chhôh liata Auditorium sâkha sana awpa. (PWD)

A chô liata palâsapa Project châna he ta Mizoram nata MADC sô ahlao leipa ta, India Central sawhkhâ lâ hiapa ta DPR tao awpa a châ aw.

Auditorium sana awpa su he Siaha Town area chhôh achu pasiapa achâ tawhta College Vaih liata Laila Hall yna su he Siaha Town liata a lialôh via chaina su a châ hleikhô ta Public Access rainao viana chai awpa su a châ vâta zawpi châta apha chai nahta pangiasapa a châ.

Laila Hall yna tlâh zydua NH54 nahta a level pa ta chhia pathlahpa châ aw ta, he hawh ta saduthliepa a châ hra(he he final châ mâh hlei vei):-

1. Ground Floor:-
~ Motor Parking.

2. Multi Purpose Public Hall (Name: Laila Hall)

3. Badminton Court (up to 3)

4. Sports Disciplines, MTP and Other NGOs Meeting Hall.

5. Public Announcement Room.

Auditorium he Floor 7 taihta y thei awpachâ ta, amount chhao Rs.15 Crores hlâ ta ahnai via lei awpa a châ. DPR tao daihti liata NGO nata VC nahzy châ rohpa ta pachâna thyu theipa a châ aw.

Deed of Agreement liata paryhsapa hawh ta Project he ahlao avaw tloh theipa ta a châ khia rai zydua liata 50% he MADC ta hria aw ta, NECS ta 50% a hria hra aw.

He Agreement Sign liata Eye Witness tuhpazy cha Puhpa K. Hrahmô, EM(i/c Education) nata Puhpa K. Chhuabei, EM(i/c PWD) zy châ ei ta, Agreement Paper liata Puhpa K. Vanlalliana, DCEO ta Witness tuhpa châ ta â sign hra.

Puhpa Romawia he Triple “R” (RRR) tahpa pahnopa châ hra ta, North East India liata Private Business Service ataopa “Consultant” liata cha chyhsa hlaotloh kawpa châ ta, Mararâ liata a raihria a lâluah chaipa cha Tipa nata Siatlai likawh liata Central School ama sa ngâhaipa he a châ.

Kô 4 khô lâ cha Mararâh liata Elementary School(Primary & Middle, Class - VIII included) zydua he School Building pha kawpa eima hnei thei chyu nahta hnabeiseihpa a châ.

_(Admin, MNN. Source: I & PO, MADC)_