Delhi liata Puhpa A.Zakia Padmashri Awardee sahlaota Mara reih Seminar

PACHAWH 6 DELHI (MNN): Târi noh 5th April, 2018 liana khata MSO Jt. Hqrs. Delhi pachhuahpanohpa ta Marasaw tawhta Padma Shri Award a dao tuachaipa *_Puhpa A. Zakia alykheina nata Leadership Training cum Mara Reih Workshop - 2018_* cha Immanuel Community Church Hall, Malviya Nagar liata hneipa a châ.

Programme he session sâno ta pachhaihpa ta, first session he Puhpa A. Zakia alykheina châta daihti hmâpa châta, President St. Joel Mychhua Nôhro chhihthana ry liata Rev. Dr. Peter Bei Chatlai Beita ta thlahchhâna hneita daihti athaopa a châ. DMCF Chairman St. Gospel Thâlai Nôhro ta biereina chyupa hnei ta, Treasurer Ls. Naki Paithachhô ta MSO vyuhpa ta Alykheina Ryuchâ nata pawpi hlâna a hnei. Senior Advisor, St. Delson Nôtlia ta Padma Shri Awardee - 2018 Puhpa A. Zakia apakyhna (interview) daihti ahnei.

Second session he Vice President, St. Elvis Lalbiaksanga chhihthana ry liata hneipa châ ta, Leadership Training cum Mara Reih Workshop a châna hawhta special guest Puhpa A. Zakia ta zawpi apua pakhypazy hnohta Mara Reih pachuna pie ta, hiahrina daihti chhao pahy pata zawpi lâ tawh chhaota hiahrinazy hnei pata daihti ahmâpa a châ. Mara Reih Workshop resource person châta raopa  St. Gospel Thâlai Nôhro nata St. Delson Nôtlia zy ta zawpizy pachuna ama pie hra.

Leadership Trainning resouce person châta raopa, Rev. Dr. Peter Bei Chatlai Beita ta PowerPoint hmâpa ta zawpi apua pakhypazy hnohta pachuna pie ta, St. Joshua Miahlung nata Ls. Merina Khithie zyta zawpizy hlasana ta amâ sualâ. Asst. General Secretary, St. KT. Beiryudaosa ta vote of thanks reina hnei ta, chakhai tawhta Chicken Biryni pahâh ngâsâpa ta zâ pati niena hneipa ta daihti pachhâpa a châ.

Puhpa A. Zakia he kô 1992 liata President Shankar Dayal Sharma tawhta National Award for Teacher avaw dao ha chiepa châta, takô kô 2018 liata President Ram Nath Kovind tawhta Padma Shri (Education & Literature) he vaw dao heih ta, India President pano tawhta he hawhpa palyupalihna adaopa he Mizoram state tawhta y tlâ mahleipa eita, India râh pôhpalôhpa lia chhaota ama chyh ngâsâ, âno hawhpa Marasaw tawhta eima hneipa he apalai khei âchhih hmeisei.

MSO Jt. Hqrs. Delhi pachhuah panohpa Leadership Training cum Mara Reih Workshop he ei no ama pachhuahpanohna châta, manôh apuapazy ta amâ thôh khei ngâsâ, hmialâ daihti lia chhaota tao pazao lymâ awpa achhuahpa a châ. Padma Shri Awardee 2018 Puhpa A. Zakia Interview na nata programme zydua he Gt Images ta video coverage tao ta, thlai ta Siaha liata Cable TV nata YouTube liata sopa ta zawpizy mothei awpa ta pachhuahpanohpa a châ.

Immanuel Community Church Hall he Marasaw Rev. Dr. Peter Bei Chatlai Beita ta a mohôhpa châ ta, a no chakaona Achhyna O a châ.

Marasaw nata Mizoram (Mawrâh) tawhta Padma Shri Award 2018 a daopa a y chhôhpa Puhpa A. Zakia cha atanoh zâlâ 2:20 kha ta Lengpui Airport a tlâhpa ta avaw tlô haw.

He su lia heta Aizawl Mara Welfare nata Mara Students Organisation : Jt.Headquarters Aizawl zy ta ama dy.

Puhpa. Hiphei, Speaker Mizoram ta hrua-eihpa zy châta Chaltlang Tourist Lodge lia zâpati â chhuahnohpa hra.

(GT. Nohro, Admin, MNN)