Palâ Tipo Mini Hydel Project - Notla bia pakhaihtuh awpa

Notla bia, Phurâ nata a chheipâh khihzy châta dôhlatha piepapuatuh awpa nata notla bia châta dôhlatha hnawh pha kawpa châ awpa ta Palâ tipo ti khô pathlahpa hmâh phahnaipa ta, Forest & Environment Department, MADC hmahlana ry liata Dôhlatha 100Kv piepapua thei awpa, Mini Hydel Project tao haipa he na hmô mâh hra tlyma?

NITI Ayog sôh, kô 2015 liata he Project châta ama kaw piepa hmâpa ta MADC Forest & Environment Department, MADC chata kô 2 chhôh tlai achupasiana nata mohpasiana rai hriapa ta, sao, nopi, châhvâh nata chasipaw daihti liata Palâ Tipo ti khô pathlahpazie nata, he ti khô pathlahpa hmâh phahnai thei n’awpa dâh liahsa amâ chupasia tawhta,  he ti khô pathlahpa thatlôna hmâpa heta 100Kv-150Kv dôhlatha taopapua theipa a châ awpa zie nata, Phurâ WRC, Hectare 100 a kawhpa chyhtuh awpa tilana (Irrigation) hnawh a châ thei awpazie hmôpapuapa ta, hmah ama la hapa a châ.

Notla bia châta dôhlatha hnawh châ awpa Micro Hydel Project

Kô 2015 tawhna khata he dôhlatha taopapuana, Hydel Project tao pathaona rai he pathaopa vaw châ ta. He Project châta peimawhpa hmiatua chaipa, Dam/tipa-ona cha Palâ tawhta Miepu siepahliena lâthlôh, Tipo tawhta metre 200-pa liata taopa châ ta. He ti pa-opa he metre 200 ta pasihpa, metre 3 rachhôhta â thuhpa a a châ.

He Project tawhta Dôhlatha taopapuapa he kheita piepapuapa a châ aw?

He Project tawhta dôhlatha taopapuapazy cha dôhlatha piepapua tyhna dâh, a tôh bôpa ta dôhlatha ri hmâpa ta piepapuapa châ aw ta. He châna heta Electric Department nahta asaohiahpa ta hmahla awpa ta saichhieliena liata sopa châ ta. Chhaichhi nano nanopa angiah awpa chaleina châta tlaw thysy 15.00 (lakhs) â ngiah na ta reipatipa a châ. He heta raihriatuhpazy hlao awpa taihta a pahly.

He Project tawhna heta dôhlatha khazie tlaima taopapuapa a châ aw?

He mini Project ta dôhlatha a taopapua thei n’awpa dâh/ziepa reipatina cha he hawhna heta a châ :

‘Install capacity’ he 125KVA (125Kilo-volt Ampere) châ aw ta, nohkha ta dôhlatha unit 2160 (Kwh) rachhôh a piepapua thei awpa hawhta reipatipa châpa ta, (Expected unit Generated per day(90x24hrs) = 2160 units(Kwh)), he heta Odyh khazie rakhama cha khaihna a pie thei aw.

He Project heta sôh a hria papua thei ma?

He dôhlatha taopapuana Mini Project he hmâ thei hmeiseih awpa ta patlô liahsapa a châ tita cha, sôh lapangiana pha kawpa a châ thei na ta a hnabeiseihpa châ ta. Atahmâ ta Power & Electricity Department ta thlakha ta dôhlatha hmâna mâ (Energy charge per month) ama siekheipa hawhta reipatipa ta,  nohkha ta he Project tawhta dôhlatha taopapuana châta sôh hryuh awpazie he tlaw 7884 (Cost of Unit Generated / Rupees per day(2160xRs.3.65)   =  Rs.7884/day) a châ awpa hawhta reipatipa châ ta. P&E Department siekheina  hawhta a châ khiahta cha dôhlatha a hmâhtuhpazy tawhta sôh (Revenue) avaw ngia awpa cha kô kha ta, Rs. 28,38,240/-a tloh thei awpa hawhta reipatipa a châ.

He hawhta Forest & Environment Department, MADC ta chavah/tipo ti leilô chakhyh thlâh ha awpa hmâh phahnaipa ta, dôhlatha hnawh lâta ama pachâsa awpa he aly achhih ta. He Project he pitloh tlai sala, notla bia liata khihzy châta ‘khaihna’ hnawh vaw châ sala, a châna dopa hawhta nata saduthliena dâh hawhta tlaita raihria tlai mawh mawh sy.