Puhpa KT Beichô, IRAS ta Châkhei liata Awareness hneikhei
CHAKHEI, 21 April, Pachyhnoh(MNN) - Zâhnia liana kha ta Puhpa KT. Beichô(IRAS), Commissioner & Secretary, PHE / Excise & Narcotics Dep’t, GoM cha a khih Chakhei liana he ta Community Sanitary Complex(CSC) nata Solid & Liquid Waste Managnent “Awareness Campaign” hneipa ta Chakhei zawpi pachuna a hnei.
Puhpa Beichô he a lahpinô Pihnô Mapuii ta kaw zi ta, Lunglei tawhta Engineer(PHE) zy ta kaw zi ei ta, Chakhei biatuhpa MDC Puhpa K. Hrahmô, EM(i/c Edu) chhao ta he hawh ta a bia liata chyhsa peimawhpa ta bia châta phahnai awpa hmotaopa pahnokhei awpa ta Programme he ahlaopa ta, biereina chyupa hnei hra ta, a bia liata MADC ry lia hleikhô ta Mizoram Sawhkhâ ry liata Mara Officer nahzy nahta hriaparaohna pha kawpa a hnei thei vâta âly zie a reih hra.
Chakhei zawpi ta he Awareness Campaign he pasô kaw ei ta, MCHP zy ta seihtôhpa thiepa ta kyhchhi amâ chhuanohpa hra.
Chakhei liata Awareness Campaign hnei hlâta Tipa liata târi 18 April 2018 pa ta hneituapa a châ.
Puhpa Beichô he a pina khih Châkhei khih â kaw ngia no ta Vaihpi School Tlâh liata dyna Gate pha kawpa taopa ta NGO nata Sawhkhâ Dep’t to tawhta pawpi ri patohpatiapa chyupa ta arônah thei chaina hawh ta palyupalihna sâhchaipa chhao ta dypa a châ.
Puhpa KT. Beichô he Chakhei saw tawhta Central Service hmiatuapa lâta a pa 2-na châ ta, 1990 batch a châ.(Ano hmiata liata Puhpa Laima Chozah, IAS y ta, 1988 batch a châ.)
Ano he Northeast Frontier Railway, Guwahati liata FA&CAO/WST/NFR rai a hria hainô ta azâhkô November 2017 liana kha ta kô 3 chhôh ta Mizoram sawhkhâ ry liata hria awpa ta Deputation ta kaw sopa châ ta, PHE nata Excise & Narcotics Dep’t zy liata Commissioner nata Secretary pakaoh awpa ta post pa a châ.
Aizawl liata â kaw tyu tawhta eima pahno theina liata PHE môhôhna awpa châta Siata khih châta Rs.47 Lakhs nata Chheihlu khih châta Rs.32.00 Lakhs Estimate zy apatohpatia hapa ta pahnopa châ ta, Chakhei châta deikua Solar Energy hmâpa ta tao haipa a châ vâta khihchhôh châta Solid Waste management taona awpa châta Rs.15.00 Lakhs Estimate atao ha hrapa ta pahnopa a châ.
Puhpa KT. Beichô he Mizoram State liata a y chhôh ta Marasawzy ta eima pahnaikhei kaw nahta hnabeiseihpa a châ.
(Admin, MNN)
