FA CUP SEMI FINAL : Manchester United 2 - 1 Tottenham Hotspur
LONDON: Zâhnia zâ khata Manchester United chata FA Cup Semi Final liata liahsa si ama phaoh tawhta thyu pathipa ta Tottenham cha 2-1 ta pahniepa ta a ei 20-nawpa ta FA Cup final amâ ngia ha heih.
Alexis Sanchez nata Ander Herrera zy ta goal khôpa ta, Tottenham hmia a sahna goal khôtuhpa Dele Alli hriapasana hrao lei pachâsa ei ta. Tottenham ta kô hluhpi chhôh nyungiapa chakâhna ama hmiachhyna noh a pasih via lymâ chy awpa alyu kaw heih.
Spurs heta akhaihna pathao pasu via ei ta.
Harry Kane nata Son Heung-min zy ta ama khô daihmâ. Deikua Spurs heta ama zydua hriaparaohna zawzi ta minute 11-na liata goal ama khô tua haw.
Davinson Sanchez ta ball avaw pathluahpa cha Christian Eriksen ta vaw la ta, he Danish midfielder he Paul Pogba vaihna tawhtapa a tliehpapuapa ta tlyliah chachâh lá ball a râkheipa ta, a kâ lâ tawhta Alli châta ball pha chaimâhpa a za pathluahpa cha Alli heta atahmâ season liata a goal 13-na châ awpa ta goal lâta avaw pachâsa hapa a châ.
Spurs heta First half liata amâ khaih pha viana deikua goal hluh viapa khôna daihti ryhpaohpa lâta pachâsa thei leipa ei ta, Eriksen ta Son ball vaw chapiepa a vei hmâ leipazy chhao i â chhih kaw.
Atahmâ duasu liata cha Pogba he United boss Jose Mourinho châta cha nôpona châ lymâ chy ta.
Mourinho heta Pakhynoh zâ ta Bournemouth ama pahniena akhaihna liata Pogba heta a theina palásapa ta 2-0 ta pahniena to heih ei ta; West Brom ama pahnie leina akhaihna hmiakô liana hlâ khata cha â khaih pha kaw.
Anodeikua zâhnia zâ ta akhaihna liata Spurs hmia a sahna goal kha Pogba taochheipa châ heih ta, he hawhta a châ nota Pogba heta tha nata zâh a hneizie nata a thaina theina palâsa heihpa ta, Mousa Dembele tawhta a tlieh papuapa ta Sanchez goal khô awpa taopa ta. Sanchez chhao he Pogba hawhta atahmâno cha reipasipasua a hlao kaw. Arsenal tawhta Nawh thlâpâ liata United tawhta âvaw pasie tawhna khata Premier League history liata hlao hluh chaipa châpâ ha ta. Anodeikua, Wembley liata akhaih chhie muarua vei.
Tottenham heta daihti ryhpaohpa hnei ngâkaw tyh hr'eisala goal deikua khô chhi thei leipa ei ta. Amâ vâsâhna pazaotuh awpa ta Sanchez ta ball avaw chapiepa pha kawpa cha Herrera ta goal lâta vaw pachâsapa ta, United tlôna goal a za pangia hapa a châ.
