Zôthlôh pasana hneina chôta FIFA World Cup liata goal a khô!
Zãhnia lâta akhaihna mopha kawpa, Spain nata Portugal zy akhaihpa kha atakô World Cup liata mopha chaipa hryta châ chy ta, Cristiano Ronaldo ta Hattrick taopa ta Portugal a pachhapapuana dâh chhao rei a hlao kaw chy.
Ronaldo goal hmiatua chaipa kha Real Madrid liata â khaihlâhpa Nacho vâta châ ta, ano kha First XI chhao to pha lei awpa hawhta pachâpa a châ.
Kô 28-ta uhtheipa Centre Back Nacho kha Spain Coach ta Right back liata paduasa ta, Dani Carvajal duasu a pho tahna a châ.
Ronaldo a vaina liata Penalty cheih ta, Portugal hmia a sahna Ronaldo ta a khôpa kha châ ta. Anodeikua kha Penalty a cheihpa kha thô pakhua cheingei achhuahpa ta thapi phia ta, 2nd half amâ thao tawhta daihti rei leipa liata goal rônahpa khôpa ta a thô ha tlai hra. Kha goal kha Nacho ta a râh, Spain cháta goal a khô tua chaipa a châ pâ hra.
Real Madrid liata akhaih haipa, Nacho he football khizaw liata tlaitlao awpa heta rairuna lai kawpa a tyh ta. Kô 12 deita a châ nota, zôthlôh pasana a hnei, tahpa hmôpapuapa a châ.
Real Madrid Football Academy â pazao tawhta kô no a khô tahpa liata dawhty zy ta a pasana vâta football a khaih pazao thei khao vei, tahpa bielóhiah a chhih kawpa chho ei ta.
Cháhrasala, football akhaih awpa khopasana khâchâ a hneipa, Nacho hnabeidy vei. Zôthlô pasana vâta a kyhpachâpa football bâsai awpa achhuah bohbi leipa ta, tei hualuapa ta, zôthlôh pahniepa ta, Champions League nyungiapa a chalopa dei châ leipa ta, World Cup lia taihta goal a khô haw!
Nacho ta a thâtih a reipa he vaw reih hra tua :
“Ei pasana vâta Real Madrid châta Tournamen liata ei khaih awpazy chhao thohna O ngai awpa â ngiah hapa vâta a khaih thei leipa na ta. Football akhaih thei khao va chi tahpa ta eina chho ei” tahpa ta Nacho chata UEFA.com ta amâ pakyhna liata a pasana váta football a bâsai daihmânazie reih ta.
“Vâhneichhih kawpa ta Dr. Ramirez atyh chho na ta, ano heta a mohôh n'awpa dâh na chhopa ta, athata eina bao. Á do tlai, mohropazy hlâta a liethôhta ei mohôh pha via awpa byuh ta. Ei niedo awpa nata apahâna dâh lia taihta ei sohsi kaw awpa â ngiah. Mohropazy hláta ei phao a hri via ta, khatinorai ta ei thohna [insulin, monitor, etc], ei chakaih ngáthlâh ha awpa á ngiah” a ta.
Nacho heta zôthlôh pasana a hneipa vâta a kyhpachâpa football básai leipa ta, a riahphana, chhyuna, tiamana nata hriapasana chata World Cup liata goal khô theina taihta a chhihthapa a châ.
