A Autorickshaw liata Rs 4 Lakh ama pathlapa a hneituhpa piepakhua!

AHMEDABAD: Premlata Gehlot (61), châ-ao pha leipa, Jodhpur, Rajasthan, chata Autorickshaw a kiana liata, a hriapapua tlakaihpa, âvaw pachô hnolo hrapa, Rs 4 lakh pathla tlamaw ha ta, a nôpo ta, a tao n'awpa rai pahno khao vei. Ano hra he thohna-O liata dawhtyzy ta ama â (operate) awpa hâpa ta, â mohôhna awpa phusâ a hnei tlakaihpa a pahleipa vâta a palôhru rie a thei ngaita kaw.

He hawhta nôpo pachârôhpa ta a y nona heta, a phusâ a pathlana/a myna autorickshaw driver, Nanji Nayi, ama tahpa chata vaw tlua papua lymâpa ta, Thaltej liata a phusâ a pahlei hapa cha â ki kawpa ta avaw pie pakhua ha heih.

Châ-ao pha leipa, Gehlot he thohna-O ngai awpa ta a phusâ hneichhôhpa zydua a chabapa ta a vahpa, Dharmnarayan Gehlot Ranip ST bus lia chôpa ta, Nayi Rickshaw kiahpa ta Thaltej liata Private Hospital avaw ngaipa chã ei ta.

Henah nôvah heta ama sôh hneichhôhpa amâ mochhih kawpa vâta Autorickshaw haohtuhpa Nayi cha Thaltej liata Riebu (Hotel) mâ nao viapa chho awpa ta amâ haw hra. Thaltej tlô ei ta, rickshaw tawhta chôpa ta, thopi daoh amâ kei ngiapa cha, ama phusâ khôna sahria, Rs 4 lakh liata ama lathla tahpa ama pahnopapua haw.

Pihnô Premlata chata, “Ei châ-ao pha leipa he pua â chalih ha khiahma ei ta. Kha rickshaw eima kiana driver cha athata tlua pi ta, Vastrapur police station taihta eima tlô” tahpa ta ama nôpozie a rei.

He hawhta ama nôpo kaw nona heta, he rickshaw driver, Nayi, he O â di tawhta a rickshaw vaw pathai ta, phusâ bag a hmô haw.

Nayi chata, “Ei hrochhôhta cha tluta phusâ hluhpa cha ei hmô beih leipa vâta pua ei pahlaw” tahpa ta, “Eikhapi ta Thohna-O liata ei pathliepazy nôvah, nôpipa nata pawpipazy kha ei mothlaw liata avaw lâ ei ta. Ei sawchapaw nata eima piahpa a chhipa ta Vastrapur police station eima ngaipâ lymâ. Cha liana chata ama nôvahta avaw tyuh thlâh ha ei ta, phusâ cha ei pie pakhuapã ha ei” a ta.

Nayi (52) heta kô 25 chhôh autorickshaw vaw haoh ha ta.

Premlata chata, "Nayi heta phusâ he miah vaw pie pakhua vei mawh sala cha ei hrona taihta pachha hmâ khao ngyu ma pi" a ta.

Autorickshaw driver ngâchhihpa Nayi vâta nôpipa Premlata cha dawhtyzy ta a daihti ta liata âpa ta, a hrona ama pachha hapa a châ.