ARTICLE : KHÂPA VÂTA MAW "MIETAKUPA" TAHPA LIATA "PA" HE BAIPA A CHÂ?
(From Mara Christian literature, based on Jeremiah 50:17)
- By Rev.KP Azyu
Mara thyutliapazy literature liata a vaw hra pathao pi ta aly'pa a châ kaw. Pahnai eimâ ngiah tuna vâta pahno chheipa chhao a y tyh hra.
"Mietakupa" tahpa liata "pa" bai byuh vei tahpa pahruana chhao a y tyh. "Mietakupa" tahpa liata "pa" eima bai khiah cha, Vaopa, Seihpa, Awhpa, Viahchaopa etc.. tah khai awpa a byuh aw" tahpa reina chhao a y tyh. Adona kao chhao a y.
Mara literature he krizyna vâta a vaw ypâ nata a vaw thaopa a châpa vâta Biehrai he eimâ pahniehna awpa châta eima hmâh tua aw.
Zermia 50:17 liata Izarei mo cha Khazhopa ta "Mietakupa" tahpa ta a aw ei. Cha yzie cha Miataku hmeiseihpa châ leipa ta, thliepakhona(metaphor) a châ. Chavâta "Mietakupa" tahpa he sahroh (animal) kha châ leipa ta, chyhsapa reina reikah, (metaphorical word) tlao a châ.
Mara reih liata "pa" he common noun liata hmâ tyhpa a châ. E.g. Pachutuhpa, Siaha khihpa, Awnanopa, tlaikaopa, Marapa etc.. zy liata hmâpa a châ tyh.
Chavâta "mietakupa" tahpa he Khazohpa chyhsazy reina a châ. Biehrai reihkah eimâ hly ti ta tlyma, Khazohpa bie eima rei ti ta tlyma, "mietakupa" tah awpa châ ta, anodeikua Sahroh reina châta deikua cha "Mietaku" eima tahpa chhao pei vei.
Ngiapâtuhpa, Khazohpa chyhsa reina lia deikua cha "Mietakupa" tahpa ta eima hmâ lymâ awpa a byuh. (Biehrai thiehpa liata "Mie nata Mietakupa" tahpa reihkah deikua a heihpa liata eima pazao heih aw).
