Article : MARAPA HRYTA PHO Â HNAI ASÂH NATA CHANÔ MÂ ZY LEI THEI MÂH VEI

By VÂTLÔ FACHHAI

Marapa he pho ahneipa châ pi ta, “abei, machhie, sei” tahpa pho liata â hnai, aliah, â sâh chi/pho (3) ta eimâ pachhaihpa heta, atanoh taih chanô mâ eima hawna maih liata phothao azipa ta chyhsapa ahnai asâh ta, miah a siekhei lymapa he pahno khai chyupa a châ. He kyh he na pachâ beih ma? Nô py chhôh tawhta eima vaw pikheipa tovyu ta ma na rao? Ngiaryh leina a chapahneisa tla ma? eima culture nata identity châ ta apha kaw na tah ma?

Eima misawnary RA. Lorrai nata AE. Cansor zy ta, “pho ahnai asâh paysa khao lei awpa kyh” nata “chanô mâ hawpa a châpa chhao ta pho laipa nata pho chyhpa zy he phothao pazisa leipata chyhsa zydua atlâhkhâh khai awpata chanô mâ hawna kyh” sâkha hmâh ama vaw rei leipa he khapa vâ ta e a châ aw vâ tly? Phothao kyh (the origin of family clan) eimâ laichadai tita hmiatuata rei chiehpa hawhta “chyhsa pakha moh tawhta avaw puapa, chhohchhi tawhta a vaw ypa nata chipathla tawhta a vaw sie laipa” tla a châ ei ta khaw.


Pho he Mara identity sâkha a vaw châpa vâta, eima misawnary nawhzy kha, pho ahnai asâh kyh nata chanô mâ hawna kyh he ama vaw rei leipa a châ ngyu thei aw. Mongyu sawhkhâ ta abeizy biehneina pachhâsa ta, abei nawh lâsi, mâ hawna deikua khapa hmâh vaw rei vei. Mongyu sawhkhâ nata eima misawnary nawh liata pakha kha chhâ cha, zawpi atlâhkhâhna kyh maniah vaw taopa ha mawh ei la, atanoh, chanô mâ hawna kyh liata ahnai viapa nata asâh viapa y leipa aw pita, apathluapachhaihna (discrimination) chhao y hra aw vei tahpa dei ei khophei chô tawhta ei vaw pachâ tyh.

Hlaphituhpa ta “taothai aru” tahpata hla a vaw phi pah ngapa kha na vaw patheisa kaw ta, atahmâ lâ he chôchâh kyh liata zawpi eimâ tlâhkhâh n’awpa ta, tao n’awpa aru hmeiseih. Chanô mâ pahlei awpa nata pahlei lei awpa kyh nata khei ta eima aw tahpa he eima Krizyna kô -100 eima tlô ba awpa no kha ta, khih ta zy, Awnanopata zy, pyphu ta zy ta eihluhpi reina ama vaw hnei haw chiehpa a châ. Atanoh taih pho ahnai asâh nata chanô mâ he Marapa ta vaw pahlei thei mapi. Nochhi Mara liata mâ dei he mo chyhta dâh dei a vaw pahleipa ama y.

Reipahmaoh awhpazy
*****************************
Ary lâta biehiahrina he a vaw chhy chyu teh u. Post tuhpa deikua pazao awpazy ei vaw pazao khai tawhta hmialâ via ta ei vaw chhy aw. (atahmâh he châ areituhpazy achhyna daihti a châ chy aw )

1. Pho he Biehrai liata a y ma? Biehrai liata a y khiah Biehrai Bo nata tla chhao piepa teh.

2. Pho eima hneipa he moleina a châ aw ma?

3. Pho he moleina châ vei na tah khiah, moleina a châ leizie reipasia teh .

4. Pho he moleina a châ na tah khiah moleina a châzie reipasia teh.

5. Pho liata abei pho, machhie pho, sei pho tahpa ahnai asâh eima ypa he Khazohpa khozi a châ aw ma?

6. Pho ta phahnaina nata aphahnai leina lâthôh apachâsapa a y ma? a y khiah reipasia chyu teh.