Iran pheisaih hyutuhpa ta Donald Trump a pasa kawpa ta achhypalie
Iran pheisaih hyutuhpa Maj Gen Soleimani chata US President Donald Trump achhypaliepa ta, "Iran nâ dyuh tlai khiahta la, na hneipa zydua pahleipahlô khaipa a châ aw", a ta.
Quds Force of Iran elite Revolutionary Guards general heta Donald Trump-ta Iran president biesakâ avawna nah charao kawpa, “America he eikha ta hmahta chyhu vaw sa thlu khao khâ,” a tahpa kha â chhypaliepa a châ.
Maj Gen Soleimani chata, "Eima president [Hassan Rouhani] hnohta châ leipa ta, keima hnohta na rei khohpa cha reih thlâh ha teh, eima president zachhihna khâpaleipa lâta pachâsa khâ. Na kiah liata eima y ngâthlâh ha tahpa he vaw pahno la, na patuapaluana hlâta a hnia viapa liata eima ngâthlâh ha. Miah avaw dyuh tua rai, eimâ mâ ngâthlâh ha. Adyuhna na pathao khiahta la naw, adyuhna pachhâsatuh awpa cha keima he ei châ,” tahpa ta, US president cha night club nata phusâ apacheisana su liata reikah pualeipa hmâh a paoh kawpa hawhta a bai hra.
US nata Iran he chyhu â sathlu ngâthlâh ha ei ta, Iranian President Hassan-ta "America heta Iran he aryhna a taokhei khiahta cha khizaw liata aryhna a tao tahna châ aw ta. America heta Iran he â dyuh tlai khiahta la Muslim râh zydua â dyuh tahna châ aw ta, adyuhna rarô y kawpa, mother of all wars pua leithei vei" tahpa ta vaw reih ta.
"Mother of all wars" tahpa reikah he kô 1991-liata America-ta Iraq luhpa Saddam Hussein ama tlahnao awpa nota Saddam Hussein reikah, CNN reporter ta mongyuh reihta a paliepa a châ.
Gulf war kha Saddam Hussein khata "mother of all battle" tah ta, muslim râh zydua ta America râh a baopasu awpa a pasyuna reikah a châ.
Iranian President Hassan biereipa heta Donald Trump palôh chakhei ta, athata â pahôpahâh hapa kha a châ.
Donald Trump heta hawrawpipa ta a twitter liata, “UNITED STATES HE HE HAWHTA EIKHA TA HMAHTA CHYHU VAW SA THLU KHAO KHÂ. KHIZAW TA A TAO BEIH LEIPA TAONA RARÔ YPA NA TAO CHEINGEI AW. NÂ HNO KAW LA Y” tahpa ta a pasa kawpa ta a tawhpapuapa kha a chã.
