Kaochao liata Theihia Cha-ypi (Mango Festival) hmâpa a châ
Siaha, July 20 : Atanoh zâlã dawh 2:00PM khata Siaha tawhta 39KM ta a hlapa Kaochao East khih liata Theihia chheituhpazy chheipapuapa, Siaha Horticulture Division, KVK, Siaha nata AMFU Siaha District zy hmahlana ta *Mango Fruit Festival* a rônah kawpa hmâpa a chã.
He Theihia cha-ypi hmâna he Puhpa M. Beiratlua, AMFU Kaochao East chata chhihthapa ta, Puhpa KH. Beihlô, EM(Agri & Horti), MADC cha khichhailaipa a châ.
Khichhailaipa Puhpa KH. Beihlô chata biereina hneipa ta, Mango Festival Kaochao 'E' atahmâhlâ ta hriapasa via awpa ta theihia hneituhpazy cha a pasyu ei.
Puhpa C.H.Lalmuanpuia, DHO, Siaha ta Report piepa, Kaochao 'E' khih he Siaha district hawka Beinô ngiakã liata a ypa châ ta, Kaochao chavahta Beinô â pahlyhna liata a ypa a châpa vâta Kaochao khih moh a phaoh hapa a chã.
Kaochao 'E' khih liana heta chhôhkha 237 ypa ta, chyhsa 1638 pahrâ hai ei ta, Village Council 2 ypa ta, Kaochao 'E'-I& II VC zy a chã.
Kô 2016 - 2017 chhôhta theihia chheituhpa hryta hlaotloh chaipa cha Puhpa HC. Laikhai châ ta, 40MT chheipapuapa ta, Rs. 3.50 lakh lapangia ta, Panona cha Puhpa J. Sachhua chata 37.5MT chheipapuapa ta, Rs.2.75 lakh a lapangia hra. A Pathôhna Puhpa K. Biaklawma ta 30.5 MT chheipapuapa ta, Rs. 2.50 lakh a lapangia hra.
- DIPR
