Mizoram liata Dawhty achuna College târi 7 Thlahzoh 2018 tawhta pathao aw
Aizawl: Mizoram liata medical college hmiatua chaipa nata a y chhôhpa, Mizoram Institute of Medical Education & Research (MIMER) cha Thlahzoh (August) 7, 2018 tawhta class pathao achhuahpa châ ta, pahno theina rakha liata seat 100 awpa liata seat 76 pasia hapa a châ.
Mizoram Institute of Medical Education & Research-liana heta seat 100 y aw ta, he hryta seat 70 cha state quota châ aw ta, state quota tawhta achu awpa heta chyhsa 62 atlyh pasiapa châ ha ei ta, India râh khôtho lâ tawhta achu awpa (NRI) châta seat 15 a pahawhpa liata seat 14 pasia hapa châpa ta, central quota 15 deikua central sawhkhâ ku liata sopa a châpa vâta khazie rakha tlai ma ama pasiapanô tahpa pahnopa chã vei.
He hawhta a châ nona heta seat 100 he cha pabie cheingei amã chhuah tahpa reipa châ ta, MIMER-liana heta department sâthôh anatomy, physiology nata biochemistry-liatazy pathaopa châ aw ta, atahmâ duasu liata kho a khi khai mãh hra vei sala, chhaichhi-hmobaoh nata hriatuhpa ama hnei pha tahpa MIMER buakheituhpazy ta ama rei.
“MIMER-liata hriatuh awpa eima hmô hôlô bâ, a hropa chhao eima tlua via ngâkaw hra. Chhaichhi nata building chhao padôkhâsa lymâ pi ta; chavâta, medical college pha kawpa a châ cheingei na ta eimâ hnabeiseih,” tahpa ta MIMER buakheituhpazy chata ama rei.
Mizoram Institute of Medical Education & Research he Mizoram state sawhkhâ eih châ aw ta, a mohôhna châta kôchareihta tlaw thysâh 50 (Crore) rachhôh hryuh awpa ta reipatipa châ ta. Ryraona hawhta cha hostel liata a y leipa zy châta MIMER liata achuna mâ he kô kha ta Rs. 80,550 châ aw ta, hostel-liata a ypazy châta cha Rs. 98,250 a châ aw.
