US ta Iran adyuh awpa ta â chhuahnoh hai - Adyuhpi ei 3-na ã hnia ha khiah maw?
July 29, 2018 : US Military Central Command hyutuhpa Gen. Votel chata, Iran chôchâh liata Middle East liata ama hrialâhpa râh - Qatar, Kuwait, UAE nata Saudi Arabia râh luhpazy a pakyhpa ta khi a tlyh hai. He nona heta ABC News chata, thla thiehpa liata US-ta Iran kupathla awpa a chhuahpa ta â “chhuahnoh hai” a ta. Iran heta Persian Gulf-Strait of Hormuz tawhta balyh laipa hmâpa ta "crude oil" ama lana chaipa cha a khaw awpa hawhta a rei.
Atliata Iran nata US hyutuhpazy cha reikah ta a tlahnao ei ta, Iran chata miah ama tlahnao tlai khiahta la “Adyuhna zydua liata pi chaipa” (mother of all wars) a chã aw, ama tah nota, US President Trump heih hra ta, “Khizaw history liata tlô beih leipa nata my beih khao lei awpa” ama hmô aw, a tah hra. Atahmâhlâ US nata Iran likah he chhie kaw ta, ti sahpa, a tlao haipa (hitting boiling point) duasu liata â duah hai.
US President parohpa George W.Bush khata, Iran nata North Korea râhzy cha “moleina apahiehna su” (axis of evil) tahpa ta vaw reih ha ta, Iraq nata Afghanistan tlahnao â ngiahpa vâta Iran nata North Korea zy kha a daihti no khata avaw tlahnao khao leipa kha a chã.
President Donald Trump chata President Bush daihti nota Iraq adyuh awpa khohtuhpa, US Ambassador to UN châta ama sopa, American paw chhyu kaw hrapa, John “Hurricane” Bolton cha National Security Adviser ta April 2018 tawhna khata rao ta, Bolton heta, “Iran chata ama moleina ty ama hmô aw” tahpa ta, hâta hmiatuapa khata President Trump-ta Iran rãh luhpazy biesakâ a vaw khai tawhta avaw reih ha hra.
Iran nata US zy he avaw dyuh ha ei sala :
US heta pheisaih hmâpâ thei awpa million 1.3 active regular service haipa hnei ei ta, Reserve million 2 hnei ta; adyuhna zawtheina 1,300 hlei hneipa ta, adyuhna balyh 282, Nuclear power-aircrafts carriers 11, Small Patrol boats 200, Tanks 5,000; ama Defense Budget he China, Russia, UK, Japan, Saudi Arabia zy budget pahhlyhpakhypa hlâ chhaota hluh viapa US$ Billion 700 hlei châ ta, Fifth generation fighters -F22 Raptors nata F-35’s hluhpi hnei ta, Nuclear-Warheads 6,500 hneipa ta, a rãh maluh he million 325 ama châ.
Iran he maluh million 80 hlei chãpa ta, khizaw râh hryta thyutlia hluh chaina a châ. Tanks 1,650, Aircrafts 550 (Sovier-era nota taopa, MiG-29 zy, ama bei Shah of Iran hun daihti nota US taopa F-14 zy) hneipa ta, pheisaih hmâpâ thei awpa 550,00 hneipa ta, Reserve million 1 hnei ei ta, adyuhna balyh 50 hlei hneipa ta, Defense Budget he US$ Billion 14.5 a châ.
