Pakistan atlyhna liata Bomb-papa liata chyhsa 27 ama thi

Atanoh (25.7.2018) ta Pakistan râh atlyhna châta Quetta khihpi liata Vote pathlapa zawpi cha Bomb-ta tlahnaopa châ ei ta, he liana heta chyhsa 27 ama thi. He hleikhôna heta su hropa lâ chhao Bomb-papa thâ thei awpa y ta, chyhsa hluhpi ta hmah phaohpa, hrona pahleipa chhao ama y hra.

Atahmâ ta Pakistan atlyhna liana heta Imran Khan Party nata Pakistan Prime Minister parohpa, atliata liata nieparuna biebuapa pa-aopa, Nawaz Sharif-zy cha â chatôhei ta. Atlyhna châta Campaign ama pathao no tawhta peihriana he avaw tlô ngâthlâh hapa a châ.

Chyhsapa adona tovyuh châta a duahpa py, Human Rights Commission of Pakistan chata he peihrianazy he Pakistan atlyhna patypamâ achhuahna sai a châ, ama vaw tah hra.

Atlyhna vâta avaihna pha kawpa, pheisaih 370,000 hleizy ta Vote tlana su zy liata khâsiana rai ama hria tarawpa ta, peihriana he a tlô thlâh ha pyly.

Official zy ta ama reina dâhta Quetta liata Bomb-papa he thithlupa ta papapa châ ta, Police zy â nuapa ta Bomb he papapa a châ, ama ta. Atahmâ thla thaona lâ liata Mastung liata Bomb-papa liata chhao chyhsa 149 vaw thi ha heih ei ta. Kha Bomb-papa kha ISIS riahrupa py chata âmo taopa hawhta ama vaw phuah.

Pakistan râh liana heta he hawhpa hmo he hmothiehpa muarua châ leipa ta, nohchareih tah thei awpa ta peihriana a tlô ngâthlâh ha, tah thei awpa a châ.

Prime Minister parohpa, nieparuna biebuapa ama pa-ao haipa Nawaz Sharif he lô-O liata â tâh hai.