Aung San Suu Kyi ta Nobel Peace Prize a daopa lapakhua aw vei ei - Nobel Prize Committee

Aung San Suu Kyi châta huhiehna châ awpa ta, Nobel Prize Committee chata kô 1991 liata Suu Kyi hnohta Nobel Peace Prize ama vaw hlâpa cha chhu aw vei ei, tahpa ama phuah. He bie he United Nations (UN) ta Rohingya muslim zy thina liata maophaohtuh chaipa cha Myanmar Army zy ama châ, a tahpa vâta Nobel Prize Committee heta Suu Kyi he a palyupalihna daopa lapakhuapa aw vei ei, tahpa ama phuah ha heihpa a châ.

Atahmâ hâta Hriatua noh khata UN chata Myanmar pheisaihzy ta Rohingya chipho pamua achhuahna hneipa ta athietuna nata apatupakhina ama tlôkhei, tahpa ta, Myanmar pheisaih luhpa Commander-in-chief nata General 5 zy cha International Law ry liata ama chôchãh pachia awpa a châ, avaw tah hapa kha a chã.

Suu Kyi heta atahmâ duasu liata Myanmar's state counsel (prime minister) chãna patu hai ta. Kô 1991 liana khata Nobel Peace Prize cha Myanmar pheisaih ryureina â dyuhpa vâta nata Myanmar liata Democracy a y thei n'awpa ta hmah athata a lapa vâta ama vaw hlâ.

Anodeikua, Suu Kyi Party, NLD ta atlyhna liata pahniena ama to tawhta, Rohingaya muslim zy chô liata peihriana athata a tlôpa vâta Nobel Prize a daopa cha chhu pakhua awpa ta reikah pathliepa y tyh ei ta. Châhrasala, UN ta hmo yzie ama phuah tawhta, Suu Kyi heta Nobel Peace Prize he â vao pazao lymâ thei ha bâ aw.

(With inputs from Reuters)