US President a châna tawhta Donald Trump pabâ (Impeach) awpa achhuahna a y?

August 24, 2018 (MLT) : Zâhnia khata US President Donald Trump chata, US TV Fox News liata Programme miakha, ‘Fox & Friends’ tahpa liata, “Eina thy (Impeach)-ei khiahta la, America zawpi chyhsatozy cha ama riethei kaw aw ta, Market chhao a raokei (Crash) khai ha hra aw” tahpa ta biesakâvawna reihpapua ta. He bie a rei hlâ heta, White House liata Associated Press Reporter, Zeek Miller chata, President Trump ta ‘Impeachment’ â tyh rai khiahta la, Market cha a raokei khai ha aw, tahpa ta biesakâvawna a vaw reih ha, a tah hra.

Trump heta Fox News liana heta ano apakytuhpa, Ainsley Farhadt hnohta, “Kheita ma rai rônah kawpa hriatuhpa cha ama ‘impeach’ thei rai aw?” tahpa ta a hiahrih palie. US ryureina Opi Congress cha Republican Party ta House miano liata ryureina ama to chypa vâta ‘Impeachment’ he a y thei na ta pangiasa a chhih leipa ta. Châhrasala, atakô November thlâpâ liata ‘Mid-term Election’ liata Democrats Party ta House liata ryu ama rei thei khiahta cha, President Trump he ‘impeach’ cheingei awpa amâ chhuah aw, tahpa Sean Hannity chata a rei.

He hawhta US President Trump pazaw awpa achhuahna he, President atlyh nota Trump Campaign Chairman avaw châ tyhpa nata ano mopakha dâhpahnopa (Private Lawyer) Michael Cohen nata Paul Manafort-zy cha hmodoleipa ama tao tahpa hmôpapuapa a châpa vâta Jail liata â tâh thei awpa duasu liata a duah hai ei ta. Henah pano pachha awpa heta Trump heta Presidential Executive Power hmâ awpa â chhuah, tahpa biethâh y hai ta. Anodeikua, ano chhosietuhpa, (Advisers) sahlaozy chata, henah pano alaichadai haina Mueller Investigation patlôna taihta hâ chy awpa ta ama chhosiepa hawhta report liata palâsapa a châ.

Trump Campaign Chairman parohpa, Michael Cohen he biebuapa 8 liata thailei pachâsapa châ ta. Bank sôh anoleipa lâta hmâna liata nata Campaign sôh nieparupa hawhta baipa châ ta, ano tlaita Mueller Investigation hmiakô liata â phuah khai ha hra. Campaign Finance Rules paraopa ta, Campaign-na châta ama sôh hmôpazy cha Trump ta âvaw pakaoh tyhpa, Pitlohpa Film liata â châ tyhpa Stormy Daniels nata Playboy Model Karen McDougal-zy pakah chahuna awpa ta piepa ama châ, tahpa ta baipa châ ei ta. He he Trump ta a chhopa hawh ei ta a taopa ama chânazie reipa a châ hra. Cohen heta Trump moh he chakhi hlei leipa ta, “Candidate ta a chhopa hawh ei ta he chanô panopazy he sôh piepa ama châ” a ta.

He he hmo yzie a châ hapa vâta President Trump tlai he hmo doleipa tao awpa ta pathaopatôtuhpa liata â hlao tlô ta, thailei pachâsa heih tlô leipa a châpa hawhta chyhsa hluhpi ta pachâpa ta, “Impeachment” tahpa he avaw pua hapa a châ.

‘Impeachment’ cha khâpa maw?

US liata cha he ‘Impeachment’ dâh he kô 1787 syulyu-pa liana khata Philadelphia liata President Benjamin Franklin sahlaota President ta hmodoleipa a tao khiahta cha, a Office tawhta pabâ theina dâh he vaw tao ha ei ta. He dâh liata cha, “US President ta râh apaphasaina (Treason), thlyuna/panaopapana (Bribery) tlyma moleina laipa” tlyma avaw tao khiahta cha, President a châna tawhta pabâ theina (Impeachment) a y thei” tahpa pachohsapa châ ta. He hawhpa moleina liata US President cha âvaw hlaohli ha khiahta cha, US Congress opipa liata a chôchâh pachiapa châ aw ta, ama bietluna cha Senate 2/3 bietluna hawhta US President tawhta pabâpa a châ aw, tahpa a châ. He he ‘Impeachment’ ama tahpa cha a châ.

Kô 1974 liana khata kha daihti nota US President, Richard Nixon chhao kha ‘Watergate Scandal’ liata ‘Impeach’-pa châ ta. Maophyuh kawpa ta President tawhta pabâpa avaw châ ha hrapa kha a châ.