Football : Premier League lâ Leeds United ama vaw kua ha heih!

Leeds United cha kô 16 a khô tawhta English Football ataopasuana a sâh chaipa, Premier League lâ ama vaw kua ha heih!

Leeds United heta Chutyhnoh khata West Brom cha 2-1 ta pahniepa ta, Premier League liata lâ ama kaw kiah ha heih.

Leeds he Pachyhzâ ta Brentford ta Stoke ama pahnie khiahta tlyma, will Abeipanoh ta Leeds heta Derby County ama pahnie khiahta cha English Football league a sâh chaipa pazipa, Championship nyungiapa ama chalopâ ha hra aw.

Argentine Coach Marcelo Bielsa mohôhna ry liata Yorkshire khih club Leeds heta kô 2018-2019 Season liata Championship liata 3-na duasu topa ta, Premier League ama kiah thei khao lei tawhta, Season heihpa liata cha ama vaw kua ha bâ heih aw.

Kô 2001 liata Champions League Semi Final a tlô theipa, Leeds United châta cha Premier League lâta ama vaw kua heih theina awpa ta lâthlôh amâ chhihpa he chakhâ ngâsâ ha ta, âmo achâhtuhpa (fans)-zy châta chhao nôpo nata palôhpasana awpa a hluh kaw hra.

Kô 2004 liata Premier League tawhta Championship lâta ama za tla nona khata, Leeds heta sôh liata rairuna athata a tyh ei ta, ama duasu a chhie ngaita.

Premier League tawhta ama tla rakha tawhta Manager 15 ama lapa hryta, Kevin Blackwell - ta ama duasu taopathipa ta, kô 2005-06 Season chhochhi khata cha Premier League lâ ama kaw kua daihmâ heihpa kha châ ta; vâduana ta a pazi lymâ tah thei awpa ta Premier League lâ he kiah pathlah thei leipa ta, kô 2007 chhochhi khata Club duasu chhie chaina liata a duah ei ta, League One lâ ama tlapâ ngâkawpa kha a châ.

League One he hriena vâta Point 15-thypa ama châna chôta pathao ei ta. Season 3 chhôh tlai League One liata ama y tawhta Simon Grayson mohôhna ry liata a kaw sua via heih ei ta. Simon Grayson heta kô 2010 khata Championship lâ a kaw kiakhei ha heih ei.

'El Loco' mohôhna ry liata Leeds United amâ kaw duah papua ha heih!

Manager nano nanopa mohôhna ry liata Season vâro tlai ama pakhôsa tawhta, Argentine Coach, Football khizaw ta a hmia pahno kawpa, Bielsa cha kô 2018, Chhiepa thla khata Leeds Club hneituhpa Andrea Radrizzani, ta lapangiapa ta, he rakha tawhna heta Leeds heta hmahsiena ama kaw hnei lymâ haw.

Bielsa he Manchester City manager Pep Guardiola nata Spurs boss parohpa, Mauricio Pochettino zy chata Argentina, Chile nata Athletic Bilbao zy a mohôhna dâh liata ama reithai kaw hra.

Leeds heta kô 2018-19 Season cha Bielsa mohôhna ry liata pathaopa ta, amâ khaihna dâh chatlie chakoh kawpa nata, ball amâ piena dâh chatlie-chakoh kawpazy chata hmahsiena a pie lymã ha ei.

Kô 2018-2019 Season liana heta Marcel Bielsa mohôhna ry liata khaih 98 liata ei 54 pahniena to ei ta; 3-na duasu topa ta, vâduachhih kawpa ta Premier League akhaih thei awpa tluana 'Play-off' liata ama vâdua ha heih.

Kô 2019-20 liata deikua â chieh kawpa ta Premier League ama kiah ha bâ aw.