Article : Asiapa hawhta a pachâpazy pi chhao he vaw molei kaw thlâh pi khiah maw? - Rev.Dr.Laiu Fachhai

Paritheipa (sahma, thohna, bei, number 4, etc) a zuahpa nata a taopazy he molei chaipa hawhta a pachâpa y ei ta, châhrasala hezy a zuah leipa nata a tao leipa, asiapa hawhta a pachâpazy chhao pi he eima vaw molei kaw hra khiah maw?

Paritheipa zuapa nata taopa he moleina la a châ tlai. A zuahpazy cha chyhsa ama thie ngâ kaw tahna châ ta, a taopazy chhao âmo nata âmo amâ thie ngâ kaw tahna a châ hra. Paritheipa he atahmâno ta eima râh chariah lai chaipa nata thatlô chaipa châ ta, maniah pahnie ta, thata maniah parao ta, maniah a pahleipadia ngâ kaw.

Cha nota, zâhnia cha paritheipa ta eima râh chyhsazy maniah a paraozie he thata pachâ na ta, paritheipa a zuahpa nata a taopa moleipazy eima vei hlâta keimo Pâhstawzy, Misawnârizy, Machâzy, Khichhôh Machâzy, Biechhotuhpazy, Akaona Py Chhituhpazy nata  Sâdeh Saku Pachutuhpazy heta keimo moleinazy tawhta ro ha tua awpa byuh khiah maw tahpa ei palôh liata â vaw luah.

Pâhstawzy, Misawnârizy, Machâzy, Khichhôh Machâzy, Biechhotuhpazy, Akaona Py Chhituhpazy nata  Sâdeh Saku Pachutuhpazy pi heta

1. Paôpazypa (kuvâ, châhnamei, karaoti, sâdâ, khaini, etc) taopa moleina tawhta ro khai ha sih la; (keimo paôpazypa ia ta maniah a zai ha khiata cha, paritheipa ia ta a zai hapazy “tao kha” tah theina biehneina hnei khao ma pi.)

2. Sôh tlaichhaina moleina tawhta ro khai ha sih la;

3. Sôh chô liata maohphaona a chabapazy pi ta, sawkhâ, khitlâh, py nata Awnanopa sôhzy pahleih pabaihpa moleina nata phichhyhpa hmâna taopa moleina nata dyucheipa moleina tawhta ro khai ha sih la;

4. Thathina moleina tawhta ropa ta, tiama ta hriapasa khai ha sih la;

5. Maohphaona piepa eima châpa eima sawhkhâ rai, Khazohpa chakaona rai, eima nietluana rai nata eima maohphaona hropazy a daihti ta patlô leina moleina tawhta ro khai ha sih la;

6. Sawhkhâ rei a ngia leina; sawhkhâ ta tao lei awpa a tahpa taopa nata tao awpa a tahpa tao  leipa moleina tawhta ro khai ha sih la;

7. Pawliti Khazohpa nata sawhkhâ kho leizie ta siekheipa moleina tawhta ro khai ha sih la;

8. Atythaina moleina tawhta ro khai ha sih la, apôhkhana nata adyryna khopa ta hmo to a phana lâta pachâpa ta tao khai ha sih la;

9. Paritheipa a zuahpa eima pahnopazy biehneituhpa lâ ripaw khoh leina nata ripaw ngâh leina riahchhiena moleina tawhta ro ha sih la, biehneituhpazy chhao ta â phuhpa ta dâh hawhta hrie lymâ ha ei sala; (A zuahpa pahno thlâh ha sih la eima ripaw khoh leipa khiata cha, eima sawchapaw nata sawchanôzy ama thie ngâ kawpa eima pasaih tahna a châ.)

10. Nôvah a châ leipa liata chanô-chapaw (sex) hmâna moleina tao lei p'aw sih la, a pathaihpa ta dyhchâ khai ha sih la;

11. Haipa bie nata phichhyhpa biezy reipa moleina tawhta ro khai ha sih la;

He hawhna heta Pâhstawzy, Misawnârizy, Machâzy, Khichhôh Machâzy, Biechhotuhpazy, Akaona Py Chhituhpazy nata  Sâdeh Saku Pachutuhpazy ta a chô liata palâsapa eima moleinazy tawhta ro ha sih la, Krista lyuna hro ta phie hro hapa ta, hrozie nôchâ ta pamopâsana chôta, adona, ngâchhihna, pathaihna, tiama hriapasana nata kyhpachâna ta eima hro khai ha khiata la, paritheipa zuapa nata taopa he eima râh liata a vaw chhâ laih thlâh ha na ta ei ngiapâ.