Chakhei Joint MTP Branch zy ta Lâpi tlâhrai hria

CHAKHEI, 7th Phiata, Pahânoh(MNN) - Zâhnia pachyh noh kha ta Chakhei khih liata MTP Branch sâ thôh(Chakhei, Nazareth & Chakheitlâh Branches) zy ta Joint ta Siata khih siepakhôpa ta Chhaolô nata Siata likawh liata motor lâpi phaleipazy taopathina tlâhrai ama hria.

Athao theipa maluh 80 rachhôh châ ei ta, he tlâhrai liata MTP Sub-Headquarters: Chhaolô zy chhao ama hria hra tahpa bie daopa a châ.

Sao daihti vaw chhâ pâ laih ha ta, lâpi deikua chiatlao kaw ta, sievawna arairu kawpa vâta Chakhei khih liata MTP nôpawpazy ta meeting awpa ta khih nata râh châta tahpa ta tlâhrai he hria awpa ta ama vaw pathlupa a châ.

Chakhei he, Mararâh liata khih reiraohpa tahpa ta pahno ahlaopa châ ei ta, thyutlia saw chhâ liata ama reiraohna pahno thei awpa ta zâhnia liata he hawhta tlâhrai ama hria heihpa a châ.

Chakhei khihsawzy he kô 1984 chhaichhyh liata Siata khih taihta Motor lâpi chhia awpa ta sawhkhâ sôh vaw pua ta, Chakhei lâ taihta chhiana awpa sôh a pua lei vâta Chakhei VC nôpawpazy ta zawpi pahmaoh ei ta, vâtlâh ta Siata - Chakhei lâpi chhia awpa ta vaw pathlu ei ta, thla 1 hlei tlai lyurâh liata ariepa ta ku ta Siata tawhta Chakhei taihta motor lâpi ama vaw chhiah hra. He daihti liata VC nata mo pakha apasaihpazy ta seih nata vao zy thiepa ta tlâhrai hriapazy niedo awpa ama vaw patohpatia tyhpa a châ.

He vâta Siata khih liata motor â kaw ngia noh liata Chakhei lâ a vaw palâh pâ thei haw hrapa a châ.

Atliata liata Siata Vaihthieh liata Motor lâpi chiatlao kawpa cha Chakhei VC zy ta Job Card sôh tawhta Boulder lô ama kei phaw heih hra.

Eima Mararâh liata he hawhta lâpi phaleipazy he sawhkhâ sôh ngâlâh mokhâh thlâh leipa ta tha nata zâh hmâpa ta eima hria thei chyu khiah eima râh he hmah a sie via cheingei nahta pangiasapa a châ.

(Admin, MNN. Source: Chakhei WhatsApp Group)