Siaha chyhtuhpa dôhlatha TRANSFORMER phaoh awpa ta patohpatia hai

Atahmâno ta Siaha khihpi ta dôhlatha liata rairuna eimâ tyhna chhâ chaipa, Lunglei Khawiva Sub-Station liata Electrict transformer rao hapa thlana awpa, Transformer laipa cha thlaita Khawiva liata soh awpa ta patohpatia haipa châ ta, a phaoh pangiana awpa lâthlôh chhao noh 3 tlai roadroller ta pamih ha ta, mylâ hriaheih noh khita ama pamih khai hmâ na ta pangiasapa a châ.

Eima pahno chyupa hawhta Chho lâta khaihna miah pietuhpa, transformer laipa cha a rao hapa vâta Siaha nata Lawngtlai dist mia 2-pazu cha atanoh taihta khaihna â ripa ta ama hnei awpa a ngiah ta. He heta zawpi châta rairuna a tlôkhei. Khaihna chiepadâh leipa ta a y nawpa noh amâ ngiahtiah lei kaw.

Ryrao chhieliena hawhta a châ khiahta cha transformer laipa la awpa heta pakhy noh heta Aizawl pangai achhuahpa châ ta, transformer phaoh awpazy amâ mâ khiahta cha pachyh noh (dt. 13.10.2018) khita trailer liata load hmâ awpa â hnabeiseihpa châ ta, a mylâ Abeipa noh (dt. 14.10.2018) khita Lunglei pangaikheipa châ aw ta. Lunglei ama tlôkhei nawpa daihti he pahno chhielie theipa châ leipa ta, he transformer laipa he â hri kaw ta, motor a phaohtuhpa heta â râ tyhna dâh hawhta â râkhei thei na ta pangiasa a chhih leipa ta, chavâta zâ 1/2 chhao lâthlôh liata â riekhei â ngiah thlâh ha thei.