Thlahchhâkhei Ahawna - By Rev Dr Laiu Fachhai

1. Pinô Debbie Fachhai (Vânoh Nô) châta

Paritheipa ia ta a zai hapazy mohôh ta paduapathina rai hria n’awpa ta ECM ta a paduapa Amôbyuh Vaithieh (Zero) liata Interim Manager thiehpa châta Pinô Debbie Fachhai (Vanoh Nô) cha raopa châ ta, zâhnia Hriatuanoh (05-11-2018) tawhna khata a su liata y ta a rie awpa ta a sie haw. Hriatuanoh tawhta Chutynoh ta a su liata ypa ta a rie aw ta, a châh a châh deita ta Siaha la Pachynoh nata Abeipanoh zy a kaw hmâ tyh aw.

Chakaona nata achuna vâta eima chhôhkha manôh pathôh zy eima y nano chy aw: Nôhrâh chaipa Agape Home liata y aw ta, eima sawchapawpa Vânoh Laiu Fachhai Dimapur (Nagaland) Patkai Christian College liata py 11 a chupa ta y ta, kei Siaha liata ei y via chai aw.

Agape Home he, atakô chhôh he patohpatia byuhpa zydua (fencing, quarters, etc) zy patohpatia aw ei ta, hâkô 2019 January thla chhâna lâ tlyma, February thla thaona lâ ta tlyma, tlâh-leipazy pangiapa a châ aw. A ngia khohpa maih a mâ leipa ta a ngia aw ei ta, baona a ngiapa tawhta siekheipa a châ aw. Pinô Debbie Fachhai (Vânoh Nô) thlahchhâ bao awpa ta ei châ haw ei.

2. Keima Vânoh Paw châta

Serampore College kô 200 tlohna alyna Serampore College liata eima Awnanopa ECM vyuhpa ta keima nata Rev Dr FC Beichô, Maraland Theological College Principal zy atamy eima sie aw. Aizawl taih FC Travels (Sumo) ta sie aw pi ta, Aizawl-Kolkata deikua vâbalyh ta eima sie aw. Eima siena lâpi a patlâ thei n’awpa ta nata ECM vyuhpa ta Greetings ei reina châta thlahchhâ maniah nama bao awpa ta ei châ haw ei.

Kolkata tawhta eimâ kaw lie tawhta, Mizo reih ta châbu tawtaw, CHHAN TLAK KAN LA AWM E: TUING NGE MIN CHHAN ANG? tahpa Aizawl Lengchhawn Press liata ei pachhusapa chhao Release papa a châ hra aw. He châbu châ  ta nata Senior Executive Secretary chakaona rai ei hriana châta thlahchhâ eina bao awpa ei chi ta ei châ haw ei.