Premier League : Liverpool ta pasiana hmeiseihpa ama hmiachhy pathao ha khiah maw?

Manchester City ta Premier League nyungiapa chalo awpa ta a chadaina lâthlôh pakawh via heih awpa ta League hmia a sah haituhpa, Liverpool cha ama tlyliah, Etihaad liata vaw pahniepa ta, Table liata hmia asahtuhpa Liverpool he Point 4 deita ta amâ chadai ha bâ heih.

City Boss Pep Guardiola nata anawhtazy heta ama khichhaipa, Liverpool he Etihad Tlyliah liata vaw pahnie vei mawh ei sala cha, Liverpool he a chadai ama ru kaw bâ awpa châ taraw ta; anodeikua, atahmâ Season liata Liverpool hnabeiseihna a sâh kawpa paraotuhpa châ thei awpa duasu liata amâ duah ha heih.

Akhaihna mo pha kawpa liata City nata Liverpool zy he daihti khachâ rakha ma cha 1-1 ta a pahniethai lymâ ei ta; anodeikua, daihti bitaipa chhâna awpa minute 18 deita a y bâ aw tahpa liata City châta Leroy Sane ta Raheem Sterling tawhta ball a hmôpa cha Liverpool kaovaihtuhpa Alisson patu hmâ rimâ lei awpa ta za chapiepa ta, City heta pahniena ama to hapa a châ.

Zâhnia zâ ta Premier League akhaihna mo pha kawpa liana heta, minute 40-na liata Sergio Sergio Aguero ta tlyliah hneituhpa châta goal za khôpa ta hmia a sah tua ei ta. He he 2^nd Half liata Liverpool châta atliata liata Hattrick taotuhpa, Roberto Firmino ta a zâ chhy paliepa ta, 1-1 châ ta. Atahmâ nota Premier League liata ryureituhpa tah thei awpa Club laipa mianopazy he amâ pahniethai h’aw khiah maw, tahpa ta zawpi ta ama sai thlâh ha nota, Leroy Sane avaw luahpa ta, tlyliah hneituhpa City tlôna goal za khôpa ta, daihti chhâ ta, 2-1 ta City heta pahniena topa ta, Table liata Point 4 deita amâ hlie ha bâ.

Akhaihna hropa liata Manchester United ta â zaopa ta ei palih ama tlôna châ awpa ta Newcastle United cha 2-0 ta pahnie ei ta; Chelsea nata Southampton zy 0-0 ta a pahniethai ei ta, Arsenal ta 4-1 ta Fulham pahniepa ta, Tottenham ta 3-0 ta Cardiff City ama pahnie hra.