Article : WRITTEN MARA REIH - By Rev.Dr.Laiu Fachhai

“Mara reih” eima tahpa official written Mara reih cha Tlôsai Mara reih he a châ. He he rona liata cha eima hmâ khai awpa reih châ ta, rei tita deikua cha eima kao nah kâh  Mara reih siezie ta eima khoh khiata cha eima reih thei.

Cha hawhta a châ nota, ropa lia taihta eima kao nah kâh reih chyu ro eimâ chhuah laih lymâpa he la, Mara apôhkhana nata reiraona a parao thei awpa thota, Mara reih laiseih n’awpa chhao a pakhâ thei. Tlaikao nawh la naw, chipho ta a duah awpa amâ hno tlai. Ralte, Fanai, etc reih roziezy siesai khai ei ta, Mizo reih rozie liata amâ hly khai.

Marapa deikua la cha hawhta châ ma pi. “Awh a lei chy ta na amâ pachu” tahpa Mara bieso hawhta, “Marapa he eima reih nata keimo chhao he a lei awpa châ dâhdei thlâh ha aw khiah pi maw, official written Mara reih dâhdei liata sâkha eimâ hly thlâh ha awpa tlai ta, a kao a kâh reih siezie ta eima ro pathao laih ngâ kaw heihpa he?” tahpa ngiaroh thlazohna thata ei hnei.

Ngiaroh thlahzo awpa a châ hrao leipa khiata cha na vaw chho u la, na vaw pahmoh (convince) tua rai u, ei viasazy saih u!