BSNL pachhâsapa châ aw vei; 4G thlaita pie papua aw

Aizawl: Atahmâhlâ ta electronic media, thâtihbu nata social media thokha liata Bharat Sanchar Nigam Limited (BSNL) pachhâsa awpa chôchâh liata biepapuapa a ypa chôchâh liata BSNL chata bie papuapa ta, biechaopopa a châ tahpa ama phuah. Mizoram liata chhao BSNL heta 4G service thlaita piepapua awpa amâ chhuah tahpa ama palâsa.

CGMT, NE-1 Telecom Circle, BSNL, Shillong B Chandra Sekhar chata, “He hawhta media thokha siepahliepa ta BSNL pachhâsa awpa hawhta biethâh a ypa he biechaopopa, biedo leipa a châ,” tahpa ta, BSNL cha sawhkhâ ry liata Public Sector Unit (PSU) châ ta, sawhkhâ kôpipa eih châ ta, pachhâsa awpa achhuahna y vei tahpa ama biepapuapa liana heta ama palâsa.

Ama biepapuapa ta a palâsana dâh liata BSNL Network cha râh pôhpalôh pahlypa, thotlâh su chakichabâpa taihta a tlô phapa nata su a paryhpa châ ta, mo pakha hleikhôta Defence force, Paramilitary force, PSU hropazy nata department nano nanopazy angiahna pathlâpazituhpa a châ, ama ta. BSNL heta service nano nanopa, Landline, Broadband, FTTH, Leased Line, MPLS, Mobile services, VSAT, nata Satellite phone hleikhôta a hropazy chhao pie papua ngâthlâh ha ta, 4G service chhochhi cha state hluhpi liata service hropazy hlâta tlô viapa a pietuhpa ama châ, tahpa ta Mizoram, Meghalaya nata Tripura-liata 4G service he BSNL hmâhtuhpazy châta thlai piepapua amâ chhuah, tahpa ama biepapuapa liata ama palâsa hra.