Champions League : Old Trafford liata Paris khichhaipazy ta pahniena ama to

Paris St Germain ta ama tlyliah, Old Trafford liata 2-0 ta ama pahniepa vâta ahrapathina a to haipa hawhta English Media zy ta ama cheihchalo kawpa, Manchester United châta cha Champions League quarterfinals â ngia awpa ta Paris khihpi liata 2^nd Leg amâ khaih tita pahniena ama topa dei a daih khao leipa ta, goal hluhpâ kawpa ama khô awpa â ngiah ha bâ aw.

Champions League round of 16 akhaihna, zâhnia zâ ta Old Trafford liata khichhaipa PSG heta ama khichhaina râh liata kâchhiena rai hnei leipa ei ta; Presnel Kimpembe nata Kylian Mbappe zy goal hmâpa ta French champions heta pahniena to ei ta, atliata tawhta media zy ta ama reithai kawpa, Paul Pogba cha Yellow card ei no a hmôpa vâta Red Card piepa ta papuapa a châ.

United he buakha chhôh châta ama manager thiehpa Ole Gunnar Solskjaer ry liata khaih 11 liata khaih 10 pahniena topa ta hnabeiseihna mei a  dia haipa cha athata ama kaw pa-ia heihpa kha châ ta; Europe liata ama rônahna chhao lapakhua heih awpa taihta ama za lyu kaw.

Châhrasala, PSG heta kyhtotie liata ama pahnie via tah thei awpa châ ta, European ataopasuana laipa liata ama tlyliah liata goal khâ hlâta hluh viapa ta pahniepa ta ama yna eikhana a châ hra. Paris khihpi liata târi 6 March khita 2^nd Leg akhaih heih aw ei ta, United hnabeiseihna he za hluh muarua khao thlyu vei.

Solskjaer châta thachhiena tlôkhei awpa ta 1^st Half liata Jesse Lingard nata Anthony Martial zy ta hmah phaohpâ ha ei ta; he hawhta a châ nona heta PSG chhao he ama player phapa pano Brazilian superstar Neymar nata striker Edinson Cavani a hlao leipa ta a khaih hrapa pyly ama châ.

Old Trafford tlyliah liata pahniena hla chhaota Di Maria

Manchester United liata ama hmâh phahnaileipa Angel Di Maria cha PSG châta vaw kua heihpa ta, United taolatuhpa tah lei theipa châ vei. Minute 53-na liata Kimpembe ta goal a khôpa cha Di Maria vâta â ngiapa tah leitheipa châ vei.

Di Maria tawhta ball avypa tawhta pyly Mbappe ta za khô heihpa ta, United fans zy pachârôna tlôkhei leithei vei.

Si 2 ama phaoh hapa hmahta pachârtôna khi a pha bâ thlâh bao na ta United châta Player phahnai kawpa Pogba cha Yellow card ei no a hmôpa vâta Red Card piepa châ ta, 2^nd Leg akhaih tita a hmi hmô aw ma pi. United châta cha pachârôna lai kawpa a châ.

MOM - Angel Di Maria

Solskjaer châta pasiana hmeiseihpa?

Solskjaer ta Di thlâpâ liata Jose Mourinho ama pabâ tawhta Old Trafford liata ananona hleikhôta pahniena avaw ngiakhei ta. Anodeikua, âmo hlâta kyhtotie liata pha viapa – amâ khaihlâhpazy tlahnao awpa ta Player phapa – Di Maria, Mbappe zy sahlao a hneipazy hmiakô liata pasiana hmeiseihpa amâ tyh tah thei awpa a châ.

He hawhta a châ hleikhôta, ama Player phapa Lingard nata Martial zy hmah vaw phaohpâ heih ei ta; he heta ama ziza pha haipa a paraopa chhao a za châ thei hra.

PSG lâ tawhta ama hmiatôhtuhpa pakhâ awpa ta Defender phapa amâ phahla thlâh ha chy tahpa cha zâhnia zâ ta PSG Player zy ta United defence diahsua ama phie chatlie tyhna dâh tawhna khata sia ta; Paris khihpi liata amâ khaih heih tita ama duasu he pha muarua vei, tahpa cha football khizaw pachâdâh a châ hra.

Results hropa :

AS Roma 2-1 FC Porto

Manchester United Vs PSG Highlights moh khohpa chata VIDEO :