India râh liata Cancer pasana a hneipa hluh chaina Mizoram

Kô 2012 nata 2014 chhôhta Mizoram liata Cancer pasana a hnei thiehpa chyhsa 4,656 hmôpapuapa châ ei ta, he he India râh liata â sâh chai, tahpa State Nodal Officer for non-Communicable Disease (NCD), Dr. Eric Zomawia chata târi 4, Hmypi 2019 liata ‘World Cancer Day’ hmâna daihti liata a rei.

Population Based Cancer Registries (PBCR) report  kô 2016 liatapa palâsapa ta, Zomawia chata chyhsa chanô 830 â hlaopa ta chyhsa 2,176 zy cha kô 2012 tawhta 2014 chhôh khata Cancer pasana vâta ama thi, tahpa ta, kôchareihta chyhsa 711 Cancer vâta thipa hawhta reipatipa a chânazie a reihp . Cancer pasana a hnei thiehpa hmôpapuapa chyhsa 4,656 hryta 2,089 he chanô châ ei ta, chapaw 2,567 ama châ. Mizoram liata kôchareihta chyhsa 1,552 ta Cancer pasana ama hnei lymâ tahna a châ. Zomawia chata a rei lymâna liata, Mizoram he Cancer pasana liata India râh liata â sâh chai hleikhôta, Paleih cancer (chapaw liata â sâh chai ta), Pachao cancer (chanô nata chapaw), Pavyhpi cancer (chapaw nata chanô), hypopharynx cancer (male) nata gland cancer (male) liata chhao eimâ sâh chai, a tah hra. 

He hleikhôna heta Chhi (Cervix) cancer liata India râh liata Mizoram cha â sâh chai tahpa Dr Zomawia chata reihpa ta, he hawhta Cancer pasana a hneipa ama hluh kawna chhâpa liata pa-ô-pazypa taopa eima hluh tu hapa vâta zy, sa pachawhpa, barôthu nata Vaosa eima nie tu hapa vâta a châ, a tah hra.