Literature cha khâpa maw?

Literature tahpa he atlâhpipa/chhopasiana dâh naosia chaipa liata cha ‘Châ ropa ta sopa/kheihawhpa bie rai ropa ta sopa’ tah theipa a châ. A chakhiehcharieh viapa ta nata a khopahâh viapa ta Literature chhopasiana cha – Literature cha bie nata hla â ngia kawpa ta paryhpaparipa ta châ ropa, reikah ngiapa nata novâhna a chakaihpa châropa, reikah thlâhthlipa châ leipa ta bie â ngia kawpa ta ro papuapa he a châ, tahpa a châ.

Literature tahpa reikah he Latin reih ‘literatura/litteratura’ (littera: châ tlyma ku ta ropa) tahpa tawhta lapa châ ta. ‘Literatural’ tahpa cha kheihawhpa hmo rai, a ro ta ropa tahna a châ heih hra. Anodeikua daihti nata noh â nano lymâpa hawhta Literature chhopasiana dâh deikua â nano lymâ  thei hra. Châ ropa zydua he Literature byh liata za khô khai thei awpa chhao za châ leipa ta – reikah thlâhthlipa hmâpa ta châ ropa, sôhna nata pachuna hnei muarua hlei leipazy cha Literature khopahâh viapazy ta Literature raihria hawhta â zâ pyh thei khao vei ei. Literature dopa ta cha, â ngia kawpa ta bie nata hla paryhpapuapa ta, bie nata reikah â ngia kawpa ta tobipa ta, kho-iah hnei awpa ta bie nata hla â ngia kawpa ta tobi ta, huso thlu ta, hrohna hneipa hawh tlupo ta bie nata hla a ropa cha hmotao theipa lâta a papua ha tyh.

French reih liata cha Literature reina reikah châta, "Belles letters" vaw tah ei ta, cha cha châropa mihtlaohpa, châropa khochhihpa tahna a châ.

Goodman ta cha Literature cha, "Pha patluapa, â ngia pakipa, biedopa zôzawpa a châ," tahpa ta reih ta. Literature phapa cha bieropa kheihawhpa rai, chyhsapa hrona nahta azaokhina a hneipa, kheihawhpa daihti châta ngâlâh a châ leipa, kheihawhpa daihti liana chhao raita chyhsapa châta sôhna a hneipa he a châ. He vâna heta, bie ropa liata â chakaihpa dei kha peimawh khao leipa ta, bie eima rona dâh chhao a za peimawh hapa a châ. Bie laothao a kiahpa nata bie chyhsa a kei daina dâh pasa kawpa he literature phapa châ thei leipa ta. Reikah a ngia kawpa nata bierona dâh siezie a dopa a châ awpa châ ta, bie phapa nata â do kawpa chhao rai châ sala a rona dâh liata reikah a ngiapa nata rozie dopa â zi leipa ta a châ khiahta la sôhna a hnei chyh kaw tyh. Literature phapa chata râhri nata daihti eihpa hnei leipa ta, chyhsapa hro khâ palysa tyh ta, a hroh ngâthlâh ha tyh.

Literature sôhna nata peimawhna : Literature phapa sôhzie nata chyhsapa hro liata a peimawhzie he reih khai thai rimâh awpa chhao châ leipa ta. A rakhapa deita eima palâsa tua aw –

Literature cha chyhsapa hro châta thlalâ a châ : Phôhpa hmâpa ta zy, Drama hmâpa ta zy, bie nata hla hmâpa zy ta pachâna khizaw padua ta; cha khizaw a paduapa liata pahrâpa zy hrozie cha planet hropa lâtapazy hrozie palâsana châ leipa ta, he eima pahrâna khizaw liata chyhsapazy hrozie palâsana a châ. Thlalâ liata a zâ moh pi ta, keimosasyh a zâ hmô pi ta, ataopathi awpa angiahpazy eimâ taopathi tyhpa hawhna heta Literature he chyhsapazy ta eimâ mohpasiana awpa nata eimâ taopathina awpa châta peimawh kawpa a châ.

Chipho thlalâ a châ : Literature cha chyhsapa mopakha hrozie nôchâ palâsana a châ raohpa ta chipho hawhta eima hrozie nata nôchâ palâsana châ ta, a mohpasiana thlalâ pha chaipa a châ hra. Râh nata chipho duasu cha ama bie nata hla zy tawhta a sia chai, ama tah tyh. Chipho zy chipho hawhta pahmaohkhasatuhpa nata râh hmah pasiesatuhpa cha ama bie nata hlazy he a châ. Matthew Arnold chata, "England a hlaphôh (Poetry) hneipazy ta a cheihchalo/parônahsapa tluta parônahsatuhpa hmo hropa khâpa hmahta y vei," tahpa ta a vaw reih cha maw (Essays in Criticism)!

Râh hmahsiena thabypa a châ : Bie nata hla a hlao leipa ta cha râh ta lâ chakâ paryh thei hmeiseih vei. Literature hnei phapa râh cha amâ sosâh via rai rai ha tyh. Literature phapa ta a chyh/pasa leipa râh, sôh nata thih deita ta a siekheipa hmahsiena râh liata cha hrozie athata tla pahnai ta, ryureina chhao thlaita a siechhei para ha tyh. William Wordsworth tlai chhao kha hlaphôhtuthaipa (Poet) John Milton a thi nona khata a thlahzoh ta, hetana heta vâsâhna ao a kaw awhkhei ngâkawpa kha a châ, "Hlâno English-zy apalaikhei amâ chhihna leidia khai ha ta, chhôh lâ thaphanazy kha khohleikhona zy ta a pho khai haw. Hy Milton! Vaw kua heih la, miah pahra teh, hrozie ngiapazy, phanazy, khotalaina nata biehneina zy rie miah pie heih teh," tahpa ta ( London 1802 ).

Hmahsiena ta khâchâ â chakaihpâ hapa, sôh nata thih heta chhôhchhie ialia kawpa, apalaina zy, akhotlâhnazy, khohleikhonazy, hiatliana zy, sasyh kyh â pachâna zy, chanô chapaw châna â do leipa ta hmâna nata a hropa hluhpi zy khâchâ â chakaih ta, cha zy cha bie nata hla phapa ta khâchâ a vaih leipa ta a châ khiahta cha a kho ta lai ta, ialia-thawh-lia kaw ta, chyhsapazy adona tovyuh tlai chhao he hmahta a patupakhi ha tyhpa a châ. Cha hawhpa hmahsiena phei chabiahpa chata buana lai viapa tlôkhei tyh ta, rietheipazy chati papua ta, cha-ia palôh miah paphaosa ta; he hawhpa vâna heta râh hluhpi liata buana (Revolution) avaw tlô ha tyhpa a châ. He he eima bie nata hla liata riahpaw, Puhpa J.Vialua khata vaw hmô pasia kaw ta, a hla hluhpi liata athata avaw tlâh-awhkhei tyhpa kha a châ.

Literature cha khotalaina a châ : Literature he chyhsapazy châta khotlaina dawh pyu paropa â ngia kawpa a châ. Chyhsapazy cha palôhrupa lâta khotalaina â taopa ta, a châhta cha cha chata sapa (Physical) liata khotalaina a tlôkhei hra. Chyhsapa he hmotaopa hryta â nano patlua kawpa, khotalaina tlaichhaipa, chahrytuhpa pazai kaw tlôhpa he châ ta. Cha hawhpa duasu â khiakhi kawpa tawhna chata bie nata hla zy heta miah ama pachhapapua tyhpa avaw châ.

Mathew Arnold chata moleina nata tharôh hmâna a chahra lichihta William Wordsworth a thi thlâh hapa cha a thlah a zoh kawpa na a châ ei aw, "Daihti heta ano daihti eihpa liana tlai ta ryurei thaipa nata sopa miah vaw pie heih aw ta; anodeikuala, Europe daihti hnôhpa a kaw hmâh hapa heta Wordsworth kha khataih lia rimâ cha ma â kei tyh heih aw?" a kaw tah ngâpa kha a châ (Memorial Verses).

Literature cha hnabeiseihna taotuhpa a châ : Bie nata hla phapa ta cha chyhsapazy he hnabeiseihna thiehpa a taopa tyh ei. Hnabeidyna khaoh â thuh kawpa liata a tla hapazy chhao khizaw khaihpa hmô heih awpa ta a chhi papua heih tyh ta; cha hawhpa chyhsazy chata khizaw he bie nata hla phapazy vâta pahrâna tlâh ta ama rao ha heih tyh.

Augustine A. Birrela chata, "Literature pihna chhâpa cha chyhsapazy phaohri pahua via awpa ta zy, ama moleina nata pachârôna pamysa awpa ta zy, ama châh-ao nata hnabeiseihna a thiehpa ta pathyu heih awpa zy he a châ," a ta.

Literature sôhna nata peimawhzie hluhpi hryta a chyhta reih ha pi ta. Literature he Politics hmo liata nata zyhna kyh liata râh lana awpa châta chhao a peimawh chaipa hrytapa a châ. Karl Marx châbu tataw ta, 'Das Kapital' nata a viasapaw Fredrich Engels nahta ama ropa, 'The Manifesto of the Communist Party' tahpa châbu phia 96 deita â chhapazy khata kô zabi 20-na khizaw yzie athata ama panano theipa kha châ ta. Krizyhpazy athata ama pôh theina chhâ chaipa miakha chhao kha Krizyhpa literature hiezawhtuhpazy ta athata hmah ama lapa vâta a châ hra khaw.

Khizaw liata Politics kyh liata chi a chhih kawpa hawhta ama vaw rei tyhpa nata khizaw râh nano nanopa ta ama daihny hapa, Communist raona chhâpa chhao kyh nano nanopa ta vaw reih tyh ei ta, a thaby liamarihpa hryta peimawh chaipa miakha cha Literature pyly a châ.

Mongyuhpazy ta movyhpazy sei ta ama patuna daihti liata, Mongyuhpazy palôh liata he hawhpa hmahlana kyh liata bierei chaituhpa cha, English Literature liata machhyupa, Rudyard Kipling ta, ‘Chipho hrupazy nata hnôh a khawpazy pakhaihsana rai he Morâhpaw tao awpa a châ’ tahpa ta a hlaphôh, ‘Whitemen’s Burden’ hmâpa ta tlâh a awhpa vâta a châ tah leithei’pa châ vei.

He chipho hrupa nata hnôhkhawpazy zohna ry tawhta lapapua ta, pakhaihsa awpa he Morâhpaw Phaohri (Whitemen’s Burden) hawhta pachâna vaw puapa chata, keimo Marapazy tlai chhao Morâhpaw zawzi ta khaihna râh lâ eima vaw pua hapa a châ. Cha Literature hmotao thei rimâ chy!!!