MADC : Pachutuhpa rai 70 la awpa tahpa cha daihti bitaipa y leipa ta pasiepa a châ

DMG, Siaha 8.2.2019 (Chutyh noh) : MADC ry liata pachutuh rai ruapa la n'awpa ta MADC, Education dept ta advertisement apapuapa târi noh 11 liata ropa ta ezâ awpa tahpa cha Mawrah sawhkha tawhta la lei awpa ta ama vaw tahpa vâta daihti bietai y leipa ta pasie chypa a cha.

Atahmâ ta rai la awpa ta ama papuapa zie he Middle Siku pachutuhpa 30 nata Primary pachutuhpa 40 a cha.

MADC ry liata siku zy he pachutuhpa pension nata a thipa vyuhpa ta kô daihma su ruapa ama vaw pabie khaoleipa vâta atahmâ duasu liata cha ary liata palâsapa hahna heta post ruapa zie a cha.

1.      Middle pachutuhpa – 64

2.      Primary pachutuhpa – 43

3.      Hindi pachutuhpa – 7

4.      Atliata liata mawrâh lâ apasie hapazy suruapa -  10

    *A zydua ta 124 tlai arua ha bâ*

He hawhta kô hluhpi MADC ry liata siku zy ta pachutuhpa liata rairuna thata ama vaw tyhpa vâna heta Mara râh liata achyhaipa py laichaipa MSO zy chhaota Mara siku zy hmasie via nawpa pachâpa ta pachutuhpa su ruapazy pabie awpa ta MADC nôpawpazy avaw haw ei ta, he dei châleipa ta posting and transfer nata siku liata pachutuhpa rairuahna liata rairuna a y tyhpazy a thlâ via nawpa ta achuna o ta rairuna a tyhpazy tawhta hmasie via nawpa ta pachutuh la pazy lia chhao he A KHIH (local) chyhsa khokhei via awpa nata la daihti liata Marareih chhao subject pitlohpa liata hmâh awpa ta ama vaw haw ha hra.