Rev Dr Laiu Fachhai Facebook liata ei vaw pahlao tawhta Marapasaw châta Mara moh tlai hneipa a pha chaizie ei vaw pachâ pathieh heih. Facebook tahpa cha internet khizaw liata bie to bie zaw rei khohna a châ. Facebook a vaw y pathao tawhna kha ta, chyhsa hluhpi ta ama viasa châ awpa nata ama group liata a hlao hra awpa ta na hrua tyh ei ta, châhrasala a pyh thei tyh va na. A chhâpa cha Facebook ta ei raihria daihti a la hluh tlamaw aw, tahpa ei chipa vâta a châ. Atahmâno deikua he Taiwan liata furlough ta eima y chhôh châ ta, chavâta daihti a rakhapa ta ei hneipa ta ei pahnopa vâta Facebook khizaw liata ei vaw charei pathao hra. Kô 59 lâ a ngia ngâpa châta cha Marapasaw Facebook a hmâhpa hry liata uthei chaipa chhao ei châ thei. Cha ta, Facebook liata ama viasa châ hra awpa ta hruana ei dao ti ta, Mara moh tlyma, Mara pho moh chhâ tlyma a hneipa cha a palalao leipa ta ei py lymâ. Mara moh nata Mara pho moh a châ leipa deikua ama thâtih rona lâ ei mo tua cheingei tyh. Mei saih lâ zy nâ phôh tlamaw awpa hmah châ lah ei, tahpa ei chipa vâta. Râh hro lâ liata a ypazy châta chhochhi cha Mara moh hneipa a vaw peimawh via pachai heih. Mara moh (keimo lâ moh) a phaohpa cha moh rei paw nahta thlai ta eimâ pasô haw tyh. Biehrai liata Izareisawzy ta yzie hnei kawpa ta moh amâ bipa hawhta, Mara mohzy chhao he yzie ama hnei kaw. Chanô moh nata chapaw moh bi dâh nata siezie chhao â nano. Maw moh liata achhâna lâta “a” baipa cha chapawh moh châ ta, “i” bai khiah cha chanô moh, tahpa ta Thanga/Thangi hawhpa chi he châ vei. Ei paw moh Laizô cha chanô moh châ thai beih leipa aw ta, chahawhna hra cha ta ei nô moh Pawthlie chhao chapaw moh châ thai beih hra aw vei. Chadei châ vei. HLâno Marapasaw ta moh pasipa zâ bi beih veih ei. Moh zydua bie (syllable) sânopa sai a châ – Nârâ, Kiathyu, Hlihchhy, Hlyâh, etc. A viachhie tata syllable sâthôhpa chhao a y tyh – Chakâpi, etc. Atakô 2014 he MTP ta chi nata reih pabohsa kô ta phuah chanei heih ta alypa a châ kaw. Bie cha hmotaopa ta a pazi awpa a peimawh. Chi nata reih pabohsana sâkha cha moh he a châpa vâta, Marapasaw a châpa maih ta cha he tawhta hawti eima hnei tita Mara moh ta a bi lymâ awpa ta a rei pahmô ta a pasyu awpa a peimawh ngaita kaw. Moh bituhpa chi hropa a châpa vâta chi hropa moh a phaoh hawpa chhao eima y thei aw. He chhao he a moh yzie panano hlei leipa ta Mara moh lâta DC office liata affidavit ta panano theipa a châ. Biehrai moh tlyma Mongyuh moh tlyma a phaohpa chhao Mara moh baichhi cheingei awpa a byuh. Mara moh baichhi leipa khiahta cha pho moh chhâ pahlao cheingei awpa a pha. Biehrai moh nata Mongyuh moh deita a hnei thlah hapazy châta cha pho moh chhâ he achyuna, K, Hc, FC, etc ta so thlah ha leipa ta, Khithie, Hlychhoh, Fachhai, etc ta sopa ta Mara moh a châzie thlai ta â pahno thei ha aw. Mara moh a bi ti chhao ta a lei thei leipa na tah leipa ta cha bie (syllable) sânopa moh, Deiva, Awhsi, Thlapa, Nohkhaih, etc ta a bi lymâ a chhuah sih la, eima phoryhpa (culture) chhy lymâna chhao a châ hra aw.

Rev Dr Laiu Fachhai

Facebook liata ei vaw pahlao tawhta Marapasaw châta Mara moh tlai hneipa a pha chaizie ei vaw pachâ pathieh heih. Facebook tahpa cha internet khizaw liata bie to bie zaw rei khohna a châ. Facebook a vaw y pathao tawhna kha ta, chyhsa hluhpi ta ama viasa châ awpa nata ama group liata a hlao hra awpa ta na hrua tyh ei ta, châhrasala a pyh thei tyh va na. A chhâpa cha Facebook ta ei raihria daihti a la hluh tlamaw aw, tahpa ei chipa vâta a châ. Atahmâno deikua he Taiwan liata furlough ta eima y chhôh châ ta, chavâta daihti a rakhapa ta ei hneipa ta ei pahnopa vâta Facebook khizaw liata ei vaw charei pathao hra. Kô 59 lâ a ngia ngâpa châta cha Marapasaw Facebook a hmâhpa hry liata uthei chaipa chhao ei châ thei.

Cha ta, Facebook liata ama viasa châ hra awpa ta hruana ei dao ti ta, Mara moh tlyma, Mara pho moh chhâ tlyma a hneipa cha a palalao leipa ta ei py lymâ. Mara moh nata Mara pho moh a châ leipa deikua ama thâtih rona lâ ei mo tua cheingei tyh. Mei saih lâ zy nâ phôh tlamaw awpa hmah châ lah ei, tahpa ei chipa vâta. Râh hro lâ liata a ypazy châta chhochhi cha Mara moh hneipa a vaw peimawh via pachai heih. Mara moh (keimo lâ moh) a phaohpa cha moh rei paw nahta thlai ta eimâ pasô haw tyh.

Biehrai liata Izareisawzy ta yzie hnei kawpa ta moh amâ bipa hawhta, Mara mohzy chhao he yzie ama hnei kaw. Chanô moh nata chapaw moh bi dâh nata siezie chhao â nano. Maw moh liata achhâna lâta “a” baipa cha chapawh moh châ ta, “i” bai khiah cha chanô moh, tahpa ta Thanga/Thangi hawhpa chi he châ vei. Ei paw moh Laizô cha chanô moh châ thai beih leipa aw ta, chahawhna hra cha ta ei nô moh Pawthlie chhao chapaw moh châ thai beih hra aw vei. Chadei châ vei. HLâno Marapasaw ta moh pasipa zâ bi beih veih ei. Moh zydua bie (syllable) sânopa sai a châ – Nârâ, Kiathyu, Hlihchhy, Hlyâh, etc. A viachhie tata syllable sâthôhpa chhao a y tyh – Chakâpi, etc.

Atakô 2014 he MTP ta chi nata reih pabohsa kô ta phuah chanei heih ta alypa a châ kaw. Bie cha hmotaopa ta a pazi awpa a peimawh. Chi nata reih pabohsana sâkha cha moh he a châpa vâta, Marapasaw a châpa maih ta cha he tawhta hawti eima hnei tita Mara moh ta a bi lymâ awpa ta a rei pahmô ta a pasyu awpa a peimawh ngaita kaw. Moh bituhpa chi hropa a châpa vâta chi hropa moh a phaoh hawpa chhao eima y thei aw. He chhao he a moh yzie panano hlei leipa ta Mara moh lâta DC office liata affidavit ta panano theipa a châ. Biehrai moh tlyma Mongyuh moh tlyma a phaohpa chhao Mara moh baichhi cheingei awpa a byuh. Mara moh baichhi leipa khiahta cha pho moh chhâ pahlao cheingei awpa a pha. Biehrai moh nata Mongyuh moh deita a hnei thlah hapazy châta cha pho moh chhâ he achyuna, K, Hc, FC, etc ta so thlah ha leipa ta, Khithie, Hlychhoh, Fachhai, etc ta sopa ta Mara moh a châzie thlai ta â pahno thei ha aw. Mara moh a bi ti chhao ta a lei thei leipa na tah leipa ta cha bie (syllable) sânopa moh, Deiva, Awhsi, Thlapa, Nohkhaih, etc ta a bi lymâ a chhuah sih la, eima phoryhpa (culture) chhy lymâna chhao a châ hra aw.