Puhpa Elaisa Vahnie hnohta 'Indiana Senate Proclamation' palyupalihna hlâpa a châ

INDIANAPOLIS, Feb. 16, 2019 — Puhpa Elaisa Vahnie, Executive Director of the Burmese American Community Institute (BACI), cha Senator Jack E. Sandlin, General Assembly of the State of Indiana ta târi 12 February, 2019 khata chhihthatuhpa phapa a châna nata a raihria phana vâta (leadership and service) ta 'Indiana Senate Proclamation' palyupalihna a hlâ.

He palyupalihna he Myanmar Union Day nohta Senator Jack Sandlin heta hlâpa ta, Puhpa Vahnie cha a râh chyhsazy châta â piepasapa, Burmese community châta tlokhuh â piepa, nata American zy ta zawpi ryureina ama siekheipa Myanmar râh liata hlaopatloh a chhuahtuhpa a châna zie Senator heta a reipâ hra.

He palyupalihna Indiana State Proclamation liana heta : “Puhpa Elaisa Vahnie ta Burmese-American zawpi, Central Indiana nata United States of America su nano nanopa liata a ypazy châta a raihriaphana vâta palyupalihna nata alynabie palôh hmeiseihta ei hlâ" tahpa ryuchâ â rohpâ.

Puhpa Vahnie chata, “He hawhta ei raihria nawh kawpa pahnopa a châpa he palôh hmeiseihta aly na ta, Senator Jack Sandlin nata Indiana State luhpazy hnohta moto châta su ngiaryh a chhihpa, ahyrai ta American saduthliena (American dream) hnei thei awpa ta miah amâ vaw lypa vâta alynabie ei rei hmeiseih" a tah hra.

BACI Board member Bonnie Kane chata, “Kô 2011 liata BACI avaw y tawhta Elaisa Vahnie heta Burmese-American community zy châta tlokhuh anosasyh â piepa ta raihria ta. He palyupalihna he â phuh hmeiseih. Ano vâta chyhsa pha viapa eima vaw châ theipa a châ” tahpa Elaisa Vahnie a reithai.

Burmese American Community Institute (BACI) he 'non-profit organization' - Indianapolis liata Burmese chyhsazy châta social services, educational nata vocational support châta raihriatuhpa ama chá.