Health & Lifestyle : Hnatlâna châta Coconut ti doh tyhpa phana nata athôhna

Mara reihta 'COCONUT' kheita ama ta? FW Savidge ta, 'Grammar & Dictionary of Lakher Language' avaw papuapa liata cha, 'DUDA-UA' avaw tah cha maw! 

He Coconut ti tlai chyhsapa hnatlâna châta pati phapa - proteins, vitamins, minerals hnei pha kaw ta, Calories deikua 19 dei hnei ta, thaw (fat) 0% a y. A ti he chyhsapa châta a phapa dei châ leipa ta, nopi daihti liata cha dodâpa (Beverage) pha chaipa sâkha a châ. 

Coconut ti he a pachaihpa ta sawphaohpazy nata nawh a pyhpa nô zy cháta a pha pachaih heih. 

Duda-ua/Coconut ti he khatluta a phapa ma a châ duah moh tua rai ei suh u :

Nô sâhpiti phapa châta :

Sâhpiti he Nawh sâhpi pie ngâpa, nawh a pyhpa nô zy nata hawsaihpazy hnatlâna châta hmo peimawh ngaitapa châ ta, Coconut ti heta sâhpiti pahluhsa ta, sâhpiti tha a patlôsa hra. 'American Journal of Clinical Nutrition' ta ama hmôpapuapa cha nô, nawh sâhpi a pie ngâpazy ta Coconut ti ama doh khiahta cha noh 3 chhôh ama sâhpiti pua pha via aw ta, Coconut a hlaona pati ama nie rai raipa khata dawh 10 chhôhta ama sâhpiti a taopathipâ ha ama ta. He vâna heta Coconut ti he, nô saw a pyhpa, sâhpi a pie ngâpazy châta cha doh ngiathia awpa a châ.

Thisaih asâh awpa a vaih (blood pressure)

Coconut ti gram 100 lymâ liana heta Potassium 250 mg a hlao lymâ ta, he heta na châh-ao liata thisaih a taopa kohki ta, he he BP asâh awpa vaihtuhpa pha kawpa a chã. Potassium heta pôhpa liata alôh raihriapa pha leipa a vaih tyh. Coconut ti dohpa heta thisaih sâhpa vâta avaw ypa Stroke nata hmohropazy a vaih thei.

Pôhpa/sapa khao tu awpa a vaih

Khaopa (Fatigue) nata thachhâpa zy he chanô saw a phaohpazy châta cha amâ tyh hialiapa hmo châ ta. Coconut ti heta Calorie a hnei chyh tarawpa ta, 'enzymes' nata 'amino acids' achakaih hluh ta, he heta pôhpa/sapa liata ti chyh tu awpa a vaih. Chanô saw phaohpa châ dei châ leipa ta, sapa thathyuna nata thatlôna châta coconut ti dohpa a pha kaw.

Sapa/pôhpa tha a padâh

Coconut ti heta chyhsapa sapa ata nervous system tha padâh thei ta. Ano liana heta magnesium ypa ta, he heta sapa tha a padâh hleikhôta rukhi a pazaona zy taopathi thei ta, saw phaoh nota pathapa nata a hliapazy a paphasa thei hra.

Pathi sah tyhpa a pazie-ysa thei

Na pathi a sah tyh ma? Cha leipa ta pati nie khai tawhta na pavyh liata thaopa a hluhpa vâta rairuna nâ tyh tyh ma? Coconut ti he vaw doh tyh ma y.

Chiepadâh leipa ta Coconut ti dopa heta he hawhpa liata rairuna nâ tyhpa he a cha pathlâpazipa thei aw.

Pasana hri tawhta abohna

Coconut ti liana heta 'anti-viral', 'antibacterial' nata 'anti-fungal compounds' y ta,  he heta pasana tlâhrai eima tahpa (pakhupa nata chasipa) tawhtazy a cha vaih aw. Chanô saw phaohpazy châta chhochhi cha he hawhpa tlâhrai he a pei thei kawpa vâta avaih n'awpa ta Coconut ti he do hialia awpa a châ.

(Dawhty zy asaohiahpa tluta phapa deikua y vei la y.Admn)