Mara reih : Â’ ‘Ô’ NATA ‘H’ HMÂNA - By FC Chhuasa

FC Chhuasa

Mara reih liata eima buana chai tyhpa nata, chyhsa hluhpi ta Mara reih he reih rupa hawhta ama pahno tyhna chhâpa lai kawpa miakha cha, a chô liata Letters eima vaw palâsapa miathôhpazy hmâ n’awpa nata hmâ lei n’awpa, a chhichâna eima pahnopasia tyh leipa vâta a châ via chai tyh thlyu aw.Chavâta, atanoh cha he chôchâh he eima thei dâh hawhta reipasia ta achupasia awpa eimâ vaw chhuah aw.

‘H’ hmâna

Pho to reih lia heta a aony (tone) pahnai pasâhna (stress & intonation) he a vaw y khai. Mara reih he a sia hrâlâ kawpa nata â chieh kawpa ta aony miathôh ta pachhaih theipa a châ. Chazy cha – aoki asâhpa, a liahpa nata ahnaipa a châ, d:r:m key ta â parosa thei khai. Aony/aoki hropa y vei.

Thokhazy ta, “Reih tlaita Solfa Key ta so thlâh hapa cha, Solfa thai leipazy châta a bua kaw dia”, ama tah tyh. Anodeikua, d:r:m vâta Mara reih avaw ypa châ leipa ta, Mara reih aony a y chiehpa kha d:r:m key ta sopa tlao a châ. He he pahnothai a nao via n’awpa kao hawhta pachâpa ta, d:r:m Key nahta â vaw sumâ thai ngâsâpa vâta chhopasiana chhaichhi chi kha hawhta hmâpa deita a châ. Anodeikua, cha hawhta atahtuhpazy chhao cha d:r:m aony ngâsâ he cha ama thai khai thlâh pyly hra aw. Atanoh eima hry lia chhao d:r:m tah thai leipa y ngâsâ thlyu hr’aw ma pi.

Mara aony Key thôh liata a hnai chaipa lia maih he ‘H’ bai awpa a châ.

Pamosana:

1). Chôchahrei ei chhô (Â sâhpa=m Key)

2). Thuakhai ta eina chhô (A liahpa=r Key)

3). Motor chhôh lia ei y (Â hnaipa=d Key)

Sentence miathôhna liata ‘Chhôh’ he â hnaipa ta a paropa vâta ‘H’ baipa a châ. Pamosana pie via heih ei sih la:

1). Totâ ei tô (Â sâhpa=m Key)

2). Mei ta eina tô (A liahpa=r Key)

3). Nie awpa â vaw tôh (Â hnaipa=d Key)

Eima aony/aoki â hnai chaipa lia maihta ‘H’ baipa a châ.He hleikhô ta ‘H’ eima bai khiahta cha a yzie (meaning) taihta â nano khai thei ha tyh.Thokhazy ta ‘H’ he buabâ kawpa hawhta pachâ tyh ei ta, pahleipahlô lâlao awpazy ama khoh tyh.Anodeikua, ‘H’ heta rei awpa eimâ chhuahpa liata rainaona, a chatlie kawpa ta pahnothaina kao liata tlao miah a bao hri.

Châhrasala, eima Common Language aony/aoki he eima thai pasia khai tlâ leipa vâta ‘H’ baina he eima lâlao thei kaw tyh aw. He kyh liata Mara châbu apuapazy reih hluhpa ta, thata miah a bao thei aw. Mizo reih he zôpha kawpa ta nata pakhâta ta eimâ chupasia khiahta la aony miano ngâlâh a hnei tahpa na pahnothei aw. Anodeikua, â pako-pakâpa (slur) a hluh kaw aw. He he keimo Marpazy pi ta Mizo reih eima thai thei leina chhâpa miakha a châ. Keimo ta aony miathôh hnei tlôh pi ta, Mizo reih aony Key 2 likawh liata ao pako-pakâpa he eima vaw dyutlai lei kaw sai.

‘Â’ nata ‘A’ hmâna

Hawrawh (letters) miakhapa nahta alyupa châ taraw ta, ngiana luhkhu ahneipa nata hnei leipa a y. Eima parosa dâh apahy lei viapa, ao â khaw viapa, eimâ chado viana nata a paro dâh achieh lei viapa, a luhkhu hnei leipa he ‘A’ a châ. 

Pamosana:

A = Cha, pha, sa, kha, na, la

Sentence:

1). Ei saw a cha.

2). Ei pheiky he a pha kaw.

3). Saw pathôh ei sa.

4). Malaria thohna he a khakaw.

5). Tao thei vana.

6). Pencil ei la aw.

Hezy liana heta ‘A’ eima parosana dâh cha a chado kaw pi ta, eima pakah a pahy lei kaw ta, eima tha a thi kaw.

Eima parosana dâh ao apahy viapa nata pakah apahy viapa, ao apakai viapa nata parawpachaw viapa, a chado-chadao leipa ta eima parosapa, luhkhu ahneipa he ‘Â’ a châ.

Pamosana: Â = châ, vâ, lâ, sâ, râ, sâh, râh, mâ, kâ.

Sentence:

1). He thua he a châkaw.

2). Ei cha vâ hmeiseih.

3). Aizawl lâ ei sie aw.

4). Ei sâ ei chakie.

5). Vao cha â râ haw.

6). Sâh ei daih.

7). Râhpha kawpa ei hnei.

. Khazie mâ e na chalei.

9). Na sahdô a kâ.

He liata vyh eihpa ta ropazy eima parosana dâh he, eima pakah a pahy via ta, eima ao pakai via ta, â chieh via tahpa na pahnothei aw. Mara reih cha aoki chithôh a hnei eima tahpa hawh khata ‘â’ chhao aoki kithôh ta â parosa thei hra.

Pamosana:

1). Marapa ei châ (Â sâhpa=m Key)

2). Avâ a suah (A liahpa=r Key)

3). He he ei râh he maw (Â hnaipa=d Key)

English Word miakhapa ta yzie (meaning) hluhpi a hnei tyhpa hawhta, Mara reih lia chhao he hawhpa he eima hnei hra tahpa my leipa ei sih la.

O’ nata ‘Ô’ hmâna

Eima tao pasu ma eima tao chhei ha hri tlyma?Cha leipa ta Mara reih Special-na ma tlao a châ hri tly? Khizaw pita amâ hlypa ‘O (International O)’ he keimo ta cha International O hawhta parosa khao leipa pi ta, ‘O’ he ‘OU/AU’ lâta tlao parosa ha pi ta, eima parosana dâh a hualua via ta, a i lei via ta, eima panyusa via ha pi ta, eima pakah deikua â pahy via. 

Pamosana:

1). Bie eina chho.

2). Pho khapa eima châ.

3). A palokaw.

4). Hmiakhu cho ei tai.

5). Zisu cha hrona a châ.

International ‘O’ hawhta eima parosa n’awpa lia he tlao a luh khu ha pi ta, ‘Ô’ tahpa ta ropa nata ngiana taopa a châ.

Pamosana:

1). Ti a khô pathlah.

2). Tho eima bô.

3). Sahria lia ei khô.

4). Mei lia ei phôh.

5). A chô chai lia soh tyh.

‘Ô’ eima parosana dâh cha eima ao pa-ô via pi ta, eima pakah pamai via pi ta, â icha via ta, â chieh via syulyu haw. Rei chiehpa hawhta Mara reih ta aoki miathôh sai ahneipa a châpa vâta ‘O’ nata ‘Ô’ chhao he â hnaipa, a liahpa nata â sâhpa ta â parosa thei khai hra.A aony reizie ta a chhichâna rei â chhuahpa nahta a yzie â nano khai thei tyh hra. 

‘O’ aony chi thôhpazy:

1). Zyhno ta Tybu a chho (Â sâhpa=m Key)

2). Thâtihpha eina chho (A liahpa=r Key)

3). Sa ei chhoh (Â hnaipa=d Key)

‘Ô’ aony chi thôhpazy:

1). Sahria liata ei khô (Â sâhpa=m Key)

2). Lytlâh a khô (A liahpa=r Key)

3). A palôh a khôh (Â hnaipa=d Key)

A chô liata pamosana eima vaw palâsapazy he pakhâta ta eima moh khiahta cha aoki rei ta a yzie, rei â chhuahpa â nano lymâ tahpa eima hmô thei aw.Mongyuh reih lia deikua cha Word miakhapa, yzie nata hmâna kao nano nanopa ahneipazy he, eima hmâna kao lia maihta a aoki â nano hlei vei. HOME tahpazy he a hmâna yzie hluh kaw ta, a aony alyu khaipa ta hmo nano nanopa hmâ n’awpa ta â hmâh thei. Mara reih deikua cha Word miakhapa he a aony â thla khiahta cha rei eimâ chhuahpa chhao â thla khai ha tyh.He he reih hropa hlâta a nao viana kao chhao a châ.

Kheihawhpa reih rai achu ei sih la, Language achuna ta miah tlôkhei â chhuahpa râh cha hezy he a châ.

1). Understanding

2). Speaking

3). Writing

4). Reading

He hmo miapalihpa (goal of learning language) zy he reih pachutuhpazy nata achupazy pi ta eima vaw my ha tyh. Eimâ chuna bu chhôh liata Phôh (story) a ypazy kha avao khai ta, pahnopasia khai awpa miah khokhei chai leipa ta, Mark 90 hmô ta Letter Mark hmô awpa miah saihei chai hra vei. Lesson nata Chapter tozy hmâpa ta ‘Four Goals of Language’ râh kha miah tlôkhei awpa tlao â chhuah hri. Anodeikua, 90 Marks hmô pha hapazy cha he hmo miapalihpazy liana heta a hnai thai rai rai khao veih ei.

Hmoto he thaipasia ta pahnopasia awpa ta cha, a tao ta taopa (practical) a peimawh khai. Nahkao ta theipa hlâta cha mo ta hmô pi ta, ku ta eima hriapazy cheingei he palôh nata lathli liazy ta a châh parei via tyh. A theory deita he cha a kih tlô thei tyh vei; Practice cheingei awpa â vaw ngiah ha tyh. Chavâta, Mara reih he roh la, reih la, cheih lymâ tua rai, reih nao kawpa a châ zie na hmôpapua aw.

Reih to heta siezie, lâkao, dâh nata phôh hnei chyu ta; yh cha cha Grammar eima tahpa he a châ. Grammar he Mathematics nahta a lyu ta, thai nao kaw, my nao kaw tahpa chi a châ. Chavâta, atanoh ta eimâ chupazy chhao he nawh kaw hra sala, eima Practice vei khiahta cha thlaita eima my ha heih aw.

A chhâ chaina liata cha, Mara reih he tao tlamawpa nata tah pathlei-pathlôna (accidentally) ta Marapazy chô liata vaw tla hapa tlyma, Marapazy reih avaw châ hapa tlyma châ leipa ta, Mizoram Legislative Assembly ta a vaw pathlu vâ tlyma, District Council Session ta a pathlu hapa vâta tlyma châ hra vei.Indian Constitution ta, “He he Marapazy reih châ mawh sy”, a tahpa vâta Mara reih avaw châpa châ hra vei.Khazohpa tlaita miah a piepa nata Talent hluhpi miah a pavaosapa hry liata miakhapa châ ta, eima pabohsapa dei châ leipa ta, papôhsa ta eima palaiseihsa lymâ awpa he eima tao hialia awpa (duty) tlao a vaw châ.

Ei châ ly kaw ei.

Jul 27, 2017