Mongyuh (BRITISH) chyhsa Mararâh avaw ngia tua penawh zy – By TA Chhôhu

Tlaikao râh hluh via liata mongyunah nata ama pheisaih zy ta khih hluhpi ama la ngâ nota, Tlaikao râh tawhta chho chhâna ta ama pachâpa cha Akyab tawhta  kaw mo ei ta, Police nata pheisaih a chyhta a chhipa ta Beinô ( Kolodyne) kaw tlôpa ta Tipâ nata Saikao khih chheipâh tai amâ khy. Henah he Captain Hodgkinson nata Lt. Sandes zy châ ei ta, kô 1848-49 chasipaw daihti liata a khypa ama châ.

Amâ khyna chhâ chaipa cha a râh yzie kaw mohpasia awpa nata mopathli awpa ta a châ. Captain Hodgkinson nata a pyzy heta Saikao nata Tipa râh chhôh tawhta tlâhsâh viapa liata râh poh (poh parai) ( National Flag a châ leipa ) zawh ei ta, cha ama zawna / chaluahna / raina su moh cha “Tal Thla”  tahpa ta ama bi, he “ Tal Thla”  he atahmâ ta Tipa viah vai yna su he a châ na ta pangiasapa a châ; achhâpa cha he daihti no ta Saikao nata Tipa (Abei vaih) rachhôh tawhta tlâhsâhpa a lâ thei viapa cha Tipa Viah vaih he a châ (he daihti nota Tipa ‘V’ y mâh vei) Captain Hodgkinson nata a pyzy he noh 2 noh 3 tlyma ama y tawhta amâ lie pakhua ha heih Amâ lie pakhuana chhâpa he, he daihti nota Marapa (Shendus) na amâ hrâh tupa vâta nata adyuhna a y tyhpa vâta thlai ta a kua lilawpa ama châ. Chatanachata ama râh poh/poh raih ( Flag) cha ama zawna ualua ta siesai ei ta Phila ( Paletwa) lâ ama kua ha heih.

            He he abei machâ kawpa ta a chyh nota a hmôna dâh kô 40 tlyma kô 50 tlyma a sie ha chiehpa â thei ( pahno ) thlâh tlôpa Col.L.W.Shakespear hnohta a chhona dâh a châ. Kô 40 khô lata mongyunah amâ vaw ngia heihna he pahno tlâ châ ta, chavâta mongyunah ta Marapa râh âmâ vaw ngia tua chaina kô cha 1848 he a châpa ta â lâ. Tipâ ‘V’ chhao he râh poh tlâh ( The hill of the flag) a châ na ta pangiasa â chhih.

            Captain Hodgkinson nata apyzy amâ lie pakhua tawhta kô 1865 liata Captain T.H.Lewin nata a pyzy cha Chittagong nata Arakan District râhri pasia awpa ta a khy ei ta, âmo he amâ khy pasih via vâ tly ma? Salyu tlana taihta amâ khy thlyu aw. He liana heta Marapa (Shendus) nahta a tyh ei ta, T.H Lewin-zy he vaw ka ei ta, ano (Captain T.H.Lewin) chhao hmah phaohpa ta, a sahlaonah hmahphaohpa thokha vâta nata pasana vâta ama raihria chhao patlô hmâ leipa ta amâ lie lilaw ha.

MONGYUPA NATA MARAPA LIKAH LIATA AKHAKHAINA (ADYUHNA)

            Mongyunah ama kaw lai no (Marapa râh ama vaw sihnao no) heta cha hawhta adyuhna reikhi y vei. A pachaihpa ta notla Marapa hry liata, châbu thokha liata, târi noh 2, Hmypi thlâpâ kô 1888 liata Dokulha, Vantura nata Hausata zy ta Marapa chyhsa 200 tawhta 300 taih a chhipa ta mongyu pheisaih liata ama hyutuhpa Lt.Steward nata a pyzy siehnaopa ta, Lt.Steward cha thie ei ta, a Meithei (Pistol) chhao ama lapa hawhta reina y ta, anodeikua he nota Marapa zy he khatai khihpa / khihsaw ma a ma châ tahpa reithei’pa châ vei, chavâta adyuhna hmeiseihpa hawhta rei thei’pa la châ thlyu vei.

            Missionary Rev. R.A.Lorrain  â vaw ngia tawhta a kô 10 (hraw)-na 1917 liata Zyhno ta British Sawhkhâ ta â vaona râh pabua â chhuahna chochâh deikua D.I.G. of Assam Rifles ta Superintendent of Chin Hills ( Burma) hnohta a pahnosana  ( report) a y, he heta a palâsapa cha Missionary a ma y/hnei tawhta a kô 10 (hraw) na taih chhaota Mongyunah ta Marapa â vao khai vei ei tahna a châ.

            Notla Mara (India Mara) nata Mongyupa likawh liata adyuhna reikhi y vei eima tah tarawpa ta, nochhi Mara (Burma Mara)  nahta deikua adyuhna ru kawpa a ma hnei. He Adyuhna liana heta Marapa nata Mongyupa lâ rairie liata a thipa nata hmahphaohpa y hôlô ei ta, he he kô 1916 tawhta pathaopa ta, amâ dyuhna (akana) hmeiseihpa cha kô 1917 a châpa ta pahnopa a châ.

MONGYUNAH (BRITISHER) AMÂ VAW NGIA CHY NATA AMÂ VAW NGIA PATHAONA DAIHTI LIATA MARAPA NÔCHÂ

            Marapa zy cha ama khih chyu liata avaosiana nata ryureina no-eihpa hnei ta, khotalaipa khih (Independent Village) a châpa sai châ ei ta, khih khotalaina dâh deikua kao thôh (3) ta pachhaih theipa a châ.

1.         Abei pakha ta biehneina zydua a chaba na khih, bei hropa liata chhie a pie beih leipa, biechhâna a tao theipa, khitaw nata khih chapai a hneipa ta avaona khih he a châ. Machânah reina dâh ta cha “Abei biapa” tahpa zy ta ama reih tyh hra.

2.         He kao no (2) pa liata a hlaopa he Mara bei hluh via ama châpa ta â lâ. Lyu tlana nata O sana kyh zy, sahaw-sabai cheina nata piena kyh zy nata biechhie biepha liata pachiana ky zy liata biehneina ama hnei hra, anodeikua la ano hlâta abei chônô viapa liata chhie chei a byuh khiahta la a pie thlâh hra awpa a byuh, a pie tlai hra.

3.         Khitaw, Khihchapai, he he cha a a chô liata nuby 1 (Sâkhana) nata 2         (Sânona) ry liata a ypa, âmo pasaina ta khih a padua hrapa deita châ ei ta, ryurei tlâhtlana zy nata lyu-o taona deikua âmo ku liata a y pyly; sahaw-sabai niena chôchâh chhao ama ku liata y ta, biehneina lai kawpa ama hnei hra. Khichâ a pazohtuhpa ta biehneina a piepa lymâ hawhta râhri chhao a tao thei lymâ hra.

           

            Abei biehneina he â sâh kaw ta, lai hra ta, chyhsa thie theina taihta bie a hneipa châ ei ta, mongyu reih ta ‘Supreme Power’ a hneipa ama châ.

            Marapa chi zy he Chin Hills ( Myanmar) liata a ma y no tawhta ama chô liata biehnei ta â vaw chahraohpa chi hro pho hro/chihro-sahropa he chhyh thai vei ei. Ama pahnie vei khiahta la tlâ amâ pasiesai laihpa ta â lâ. Ama kho ta nie ei ta, doh ei ta, hla sa ei ta, khoh tô ei ta, khotalaipa ama châ. Viahpa (mongyunah) kaw lai ei ta, Marapa khih (abei avaona) cha mongyuna ta panawhsa ei ta, mongyunah ku liata amâ vaw pie lymâ. A chhâ chaina ta, Zyhno khih chhao kô 1924 liata mongyunah ry liata ama vaw y ha hra. He he mongyunah ryureina India râh liata ama la hnôh chaipa “The last British annexation of India” tahpa ta rei tyhpa khâ avaw châ. He mongyu ryureina he ama vaw chhyh thai lei ngâsâpa a châ thlyu aw “Ka lâ tho thô na padai ta, hrâtlei chuna salyu ti cha doh lei, Râhpa nawhly sai pina e” tahpa ta, ama hrâsiena liata salyu chavah ti ama do tyhna my vei ei, amâ thei ngâthlâh ha.

            Mara Tlôsai-Siaha, Chapi, Satly, Vytu nata Hawthai kao tawhta, mongyunah ta ama ryureina nata haosai lôlia liata amâ chahraohnapa chôchâh liata chhyhthai leina he hlabie tawhta hmôpa za y hlithâ vei. Zyhno tawh deikua cha ama hla tawhta â pahno thei kaw.

“A ngô tâkâ ei chei ta za,

Ahpanô chhao cheily ei na ta,

tlekua pyly cheikhai aw vi e ” (Leimâ miah ama pacheisa  tawh chhaota Awhpinô vaw cheihpâ la miah ama tahpa hela khoh va na, Tlaikao na py châ awpa la khoh tiara vâna) ama vaw ta.

                       

            Machâ thokha reina dâhta Zyhno khih he pheisaih (kha daihti nota Assam Rifles) nahta siehnao ei ta, châhrasala cha hawhta a naosia kawpa ta la thei awpa a châ leipa vâta, Marapa nata tlaikaopa Rasi (Circle interpreter) zy hmâpa ta lapa ta, adyhna tao kheipa ta a vaopa ama châ. Chavâta chhie (Tax) chhao pacheisa leipa ta, ama nie awpa        (âhmie awpa ) ta Awh deikua ama papiesapa hawhta reipa a châ. Mongyunah he chi sopa a ma châna hawhta dusawta ta pahnie laipa ta, mongyupa ti nata tlâh avaona ry liata ama y tlai tahpa pahno n’awpa ta chhie ( leimâ) ama vaw pacheisa lai thlyu aw, cha dei châ leipa ta tararuahna ta rai pahriasa ta, lâpi pachhiasapazy ta British khihsaw pachâsana nata ama ry liata pa-ysana ‘ngiana ’ châta vaw hmâh ei ta, he he ama chhyh thei lei kaw. Hla pyly ta,

“A ngôh taka pie aw vana nata ma kala zapa,

kalâ lâ (lapi) cha khazia ma na chhia ?” ama vaw tah heih hra.

Ama vaw chhyhthai lei chai mâhpa na a châ thlyu aw, ama hla hropa lia chhaota he hawhta ama vaw phi,

“Araw vepi pene chhy â thei e,

Dâh ei kuali ry I chala,

hraizau ei tyu pyna aw vi e”

(He Article rei pha kawpa he Puhpa TA Chhôhu Châbu, ‘Eima Vaw Pahno Hra awpa ta” tahpa tawhta lapachhuahpa châ ta; a châbu he Siaha liata chalei theipa a châ.Admins)