"Khizaw liata ti 3% deita he ti nietlâh a châpa, ti pathaihpa a châ" - T.Vanlalmalsawmsanga, PD, DRDA, Siaha

Zâhnia târi 22 Pamih 2019 kha ‘World Water Day’ a châna hawhta zâhnia my dawh 11:00Am khata MADC Forest Hall, Siaha liata PHED WATSAN Division, Siaha pachhuahpanohpa ta ‘Observance Of World Water Day, 2019’ hmâpa a châ. Puhpa Denis Solo, Account Officer, PHED, Siaha chata he daihti he a chhitha.

Ti pabohsana/tihnawh pabohsana peimawhzie nata khizaw ta ti leipa ta hrona a hnei leizie zy, chyhsapa châta ti peimawhzie zy he noh heta reipahmaohpa châpa ta, khichhailaipa, Puhpa T.Vanlalmalsawmsanga, PD, DRDA, Siaha chata biereina hneipa ta, khizaw liata molai-mochyh, ahyrai ta khâchâh eimâ ngiahpa nata eima nohto khihsana liata â hlao leipa ta khih eima sa thei leipa cha ti he a châ tahpa ta, he tlupo ta chyhsapa châta a peimawhpa ti eima hneina hnawh zy pabohsana châh eima pahno leipa deikua he cha a pei ngaita kaw, a ta.

Khichhailaipa chata, “Khizaw liata ti zakha liata sysari (97%) he ti pathaih leipa, chyhsapa châta chhao nietlâh dotlâh a châ leipa châ ta, 3% deita he chyhsapa nata hmohrohneipazy châta nietlâh-dotlâh a châpa a châ, tahpa ta, tihnawh pabohsana he eima zydua maophaohna châ ta, pabohsatuhpa châ a chhuah chyu suh vy” a ta.

Khichhaizachhihpa Puhpa PP.Zalena, President, MTP HQ : Siaha chhaota biereina hneipa ta, Khazohpa châbu pathaihpa liata chhao ti peimawhzie hmô pi ta, ti nata chyhsapazy he azaokhina a pathuh kawpa eima hnei, a ta.

PP Zalena chata, “Tihnawh pabohsana châh eima pahno leipa vâta a mâ ru kawpa ti chalei â ngiah hapa he pei ngaita kaw ta, râhhmâhpa athata eima paraopa vâta tihnawh a kua lymâ ha bâ. Tihnawh pabohsana kyh liata Department tao awpa liata tlâ soh thlâh ha leipa ta, eima zydua maophaohna a châ, tahpa a thiehpa ta pahno ei suh u” a tah hra.

TI HMÂH THAI SUH VY Khizaw (Earth) 70% he ti ta khu taraw hrasala, he liata 3% deita he ti nietlâh a châpa, ti pathaihpa a châ. Khizaw chyhsa 6 billion hryta 1 billion zy ta ti nie awpa a phahla ei ta, 2.7 billion zy ta ti pathaihpa nie awpa kô kha chhóhta thlakha ta eikha chaheih lymâpa hawhta ama châ.  Kô 2014 liata achupasiana tawhta ama hmôpapuapa cha, khizaw liata khihpi lai chaipa sahlao 500 tawhta su pangawh pachhaih ta su palih zy cha ti pathaihpa chaheih thei awpa duasu liata amã duah hai. UN-chhihthana ry liata achupasiana ta a palâsana dâh ta, kô 2030 liata cha khizaw ta ti pathaihpa â ngiahpazie he nohkhih anano lymâpa váta nata râhmâhpa eima parao lymãpa vâta 40% ta a kaw pôh ha bã aw. Ti pathaihpa hra 70% liata 3% y tlôh ta... He hawhpa duasu sai paphatuhpa râh nôpawpazy ta ama theina zydua papuapa ta, ti pathaihpa nie awpa eima hnei lymã thei n'awpa ta hmahlana ama hneipa he aly ã chhih hmeiseih. Motor pasina châta zy, apasuna châta zy nata alila leipa liata eima hmâh chakhyh deikua khiahta la, keimo thaileipa a châ ha bã... Ti pathaihpa, nie awpa eimâ phahla lei n'awpa pabohsana rai hria chyu suh vy...