Theiva khih zawpi ta ama khihsaw tawhta hlaotlohna atopazy alykhei

Image Source : Whatsapp/BeirokhuBeita

THEIVA, 9 Pamih, 2019, Pachynoh – Atanoh my dawh 10:30 Am tawhta zâlâ dawh 2:30 Pm taihta Theiva khih zawpi ta Theiva khih tawhta hlaotloh-na atopazy alykheina programme aly kawpa ta ahmâpa a châ.

Khichhai laipâ châta Biatuhpa MDC Puhpa N. Zakhai, CEM, MADC hruapa châ ta, ano chhao ta pachâ peimawh kawpa ta he Programme he ahmâkhei ei.

Programme ahmâna su he Multi-purpose Hall hmâpa châ ta, Puhpa N. Bielai, VCP ta Chairman châpa ta Programme he chhihtha ta, Rev. S. Beizawzi, ECM College Vaih biatuh pastor ta Devotion a hmâh. ECM K.T.P Branch: Theiva zy ta Hlapy ta aduapa ta pahyna hla ama sa hra.

Atanoh liata amâ lykheipazy nata ama chânazy:-

1. Laihsa Goldy S. Ngôrili, 

MBBS

D/o S. Pawkhai

New Colony-III, Siaha

2. Laihsa Florencia N. Beibieso, 

Master of Optometry

D/o N. Zakhai,

New Colony, Siaha

3. Puhpa N. Beitlotha, 

MCS

S/o N. Chakhai,

Council Vaih, Siaha

4. Laihsa Sabina Nôhro, 

Bachelor of Dental Surgery

D/o N. Chakhai, 

Council Vaih, Siaha

He nahzy hry liata Goldy S. Ngôrili ngâlâh ta he alykheina Programme liata ahlao theipa a châ.

Khichhailaipa hleikhô ta Puhpa KH. Beithie, Puhpa K. Siakhai, Adviser to CEM, Puhpa K. Beingiachhie, P & DO, MADC zy chhao beireina chyupa ama hnei chyu hra.

Siaha lâ tawhta hrua-eihpa Artiste Puhpa A. Chhualai nata Laihsa Gloria Azyu zy chhao ahlao thei ei ta, Local Artist Beilykhei chhao hla sana a hnei hra. 

He alykheina he mo pakha tly ma, sawhkhâ ta tlyma ta sôh thyupa tawhta taopa châ leipa ta, Theivâ khihsaw zydua ta Job Card tawhta thyu chyupa ta alykheina taopa ta zâlâ kyhchhina chhao, Theiva khih zawpi ta nie awpa ta patohpatiapa a châ.

Puhpa N. Zakhai, khichhai leipa biereipa thokhazy:-

1. Hlaotloh-na ama to vâta eimâ lykheipa eima sawnawhzy, palôh hmeiseihpa alykheina bie ei hlâ ei.

2. Biatuhpa vaw châ na ta, MADC liata CEM ei châ daihti liata he hawhpa Programme eima vaw hmâ theipa he ei vaw ly ngaita. Khazohpa byhnâ a châ tah leithei vana.

3. Kô 1974 liata he Programme eima hmâna su he National Highway châta Survey ama hneina su châ ta, cha no cha Surveyor zy ama baotuhpa châ pi ta, atahmâ deikua khih parohpa tawhta avaw pasiepa ta lâpi chabypa ta khih eima sana su tlao vaw châ ta, he su lia cheingei ta CEM châpa ta ei dua theipa he ei ly zie ei vaw palâhâhpa a châ

4. Eima khih su cha rei lâlao lei, Coffee taona thih taihta motor zy tlô thei ta, byhnâ eima to zie pachâ tyh na ta, Abeipa ta hmo rônah ngaita pa maniah ataopa vâta eimâ ly ngaita.

5. Atanoh manôh pa 4, eimâ lykhei ngâhaipazy he ama mahnô mahpaw zy kha chyhsa reikah sôhpa nata areisai ngaitapa châ ei ta, ama samoh zy chhâ liata ama hmopha taona byhnâ atlô tah leitheipa châ vei

6. He hawhta hlaotloh-na avaw topa Nô nata Paw zy chô lâ liata alynabie hlâ ei na ta, zachhihna nata palyupalihna chhao ta palôh hmeiseihpa ta ei hlâ hra ei.

7. He hawhta, Theiva saw zy ta byhnâ thata byhnâ eima to haino ta Khazohpa byhnâ dythana zie ta palôh eima phaoh tlamaw aw tahpa chi âchhih kaw. Dyhchhie, dyhpha y lei ta, hmahsiena âraohâh theina awpa ta palôhru pathaihpa eima hnei abyuh kaw aw.

8. Byhnâ eima topazy vâta apalaih leipa ta, reikah phapa hmâh ei si la, châ achuna kyh liata thapi phiahpa ta tiama papua via lymâ ei suh u. 

9. Areihtuhpa châleipa ta, ataotuhpa tlao châ achhuah chyu suh u.

10. Ato liata Khazohpa hmia pasah lymâ si la, hmo phapa eima hmô daihti liata Khazohpa lâ alynabie reih tyh ei suh u.

11. Achhâ chaina liata atanoh, he eimâ lykheina liata ahlaotheipa Laihsa Ngôrili hnoh ta ahawna vaw tao khoh na ta; Specialist achu awpa ta aroh patloh ha ta, hmialâ daihti liata Theivâ sawzy he ei 1 chhâ cha asaipa ta maniah moh chyu awpa ta ei haw.

12. Atanoh eimâ lykheina Programme avaw hmâhtuhpa zydua hnoh ta alynabie chahlâ ei na ta, eimâ lykheipazy chhao hmialâ ama sie lymâna awpa liata khokheina sâh chaipa ei hlâ ei.

He alykheina liata Theiva khihsaw zy puapha kaw ei ta, alykheina Programme liata ahlao awpa ta hrua eihpa Puhpa Beirokhu Beita, ITO, MADC nata I & P Department, MADC tawhta Puhpa T. Pabua zy chhao amâ hlao hra.

Amâ lykheipazy he Theivâ khih puapa ama châ tarawpa ta Siaha liata khih asa hapazy sai châ ei ta, Siaha liata Theiva khih puapa he Odyh 70 hlei ama y pa ta pahnopa a châ.

(Written by BeiRôkhu Beitâ, ITO, MADC, Siaha.)