UK ta Citizenship a pie khoh khao leipa hawsaihpa thi!

Image Courtesy : JAMIE WISEMAN/DAILY MAIL/BBC

London, UK puasaipa ta Islamic State (IS) Terrorist py a pazao awpa ta a siepa, chanô thyudyupa Shamima Begum ta IS terrorist satlia pakha nahta ahneipa ta sawchapaw ama sapa, hawsaihpa cha Syria liata a thi, tahpa Syrian Democratic Forces biephuahtuhpa ta a palâsa.

Syrian Democratic Forces-zy heta he hawsaihpa he refugee camp ama taopa liata â pahâ tahpa ama palâsapâ hra. Medical Certificate liata palâsapa a châna dâhta cha he hawsaihpa he ‘pneumonia’ pasana ta a thipa châ ta, hâta ei 3 rachhôhta uhtheipa a châ.

UK sawhkhâ chata hawsaihpa thina thâtih chata ama palôh hria ta, pei ama tah hmeiseih, tahpa ama phuahpâ ha hra.

UK ti nata râh chyhsa châna (Citizenship) a hneipa, he chanô thyudyupa Begum heta kô 2015 liana khata a viasa panopazy nahta IS Terrorist py a pazao awpa ta UK puasai ei ta; IS terrorist he pahnie lymâpa ama châ hapa vâta UK lâ vaw kua heih awpa â chhuahpa cha UK sawhkhâ ta pasaih khao leipa ta, a ti nata râh chyhsa châna chhao ama pahluh hapa a châ.

Begum vahpa he Dutch IS terrorist riahkapa Yago Riedijk, Netherand chyhsa a châ hra. He hawsaihpa thina chôchâh he pahnosa hapa a châ.