Health & Lifestyle : Nopi daihti liata Vo mohôhna dâh nata a khâsiana dâh

Nopi daihti avaw lie ha heih ta, noh sah pha kaw ta, he nopi noh sahpa heta eima Vo châta chi a chhihpa noh zôh UVA nata UVB zy avaw chhi ta. Henahzy heta na Vo kha athata ama parao thei. Na Vo kha pahi/pachawh thei ta, a padaohsa thei hra. He vâna heta nopi daihti liata cha Vo he khâsia pha kaw awpa châ ta; chyhsapa khôtholâ ta miah tobituh chaipa, eima Vo eima mohôh pha khiahta la, chhôhlâ chhao eima mohôh pha hra tahna a châ.

Nopi daihti liata na VO ta rairuna â tyh lei n’awpa ta O lâta tao theipa a mohôhna pha kawpazy eima moh heih tua aw :

1. HMIATHIA

Nopi daihti liata, eima mathlai athata a pua tyh. He eima mathlai he bacteria nata  tlaohpa (oils), na vo liata a ypazy nahta amâ vaw pahlaopahli na ta cha hmiathia lâta amâ vaw lie ha tyh. He vâna heta na hmia liata tlaohpa (oily) a ypa pathai awpa ta cha na hmia nâ pahlie para ngâthlâh ha awpa a ngiah ta. He hleikhôna heta, hmiahruna/towel na hmâ hmopa khan a hmâh chanei ngâthlâh ha awpa châ vei. Na khoh khiahta cha sâhpiti nata gram flour hmâpa ta ‘Face mask’ tao thei chi ta. He he na hmia nâ pahlie khai tawhta hmiathia na hneina su liana khata na hnia tyh aw.

2. Hmiatlaohpa, a kiapâpa (Oily sticky skin)

Nohzôh liata UV rays a ypazy tan a Vo kha patlaoh thei ei ta. Vo tlaohpa chata hmiathia â vaw chhi tyh. Na vo tlaohpa pahlei awpa heta – sâhpiti chakuapa (cold milk), Awhti liata a râhpa (egg whites), aloe vera zy pahlaopa tan â chanô thei aw.

3. Vo liata a tatawta ta thlohpa nata pathapa

Vo tawhta mathlai puana khaoh a po tyhpa vâta vo pathapa hleikhôta a chyhta ta byuhpa tao tyh ta. He he achhâpa cha na vo khaoh liata mathlai puana khaoh kha a pamai ha ta, na Vo ry liata na mathlai ti kha â tâh hapa vâta a châ, he heta vo a hliapa, pathapa nata byuhpa tao tyh ta. He hawhta vo byuhpa avaw pa na heta, hmo ta a cha chhôpa hawhta na Vo a vaw sawpâ tyh aw. He hawhpa thohna pha chaipa cha Apple cider vinegar tlyma, dâhawhta nâpa tlyma Pôdâ chakuapa hniapa tlyma a châ.

4. Noh ta a kâpa (Sun burns)

UVA nata UVB rays zy heta na vo parao thei kaw ta, vo kâpa/sahpa tlyma, vo hipa (dry), nata vo dôpa a tao thei. He hawhta na vo a y khiahta cha sâhpiti chakuapa kha hnia tyh ma y. He hleikhôna heta Athei (Cucumber) he ‘antioxidant nata analgesic’ lâchhâh a chakaih hluh kaw ta, vaw hmâ tyh ma y.

5. Rohiah (Body odour)

Nopi daihti liata chyhsa hluhpi buana chaipa cha, ama mathlai avaw lei na ta, ama rohiah a pua tyhpa he châ ta. He he pôhpa tawhta mathlai a pua hluh kaw tyhpa vâta a châ. He hawhpa liata pha chaipa ti hluhpi doh ta, ngaisi tiama ta, talcum powder a thu tyh awpa he a châ.

6. Vo pathapa (Fungal infections)

Noh sah pha kawpa liata eimâ vaw hlaihlâ hoh tu ha na ta cha Vo pathapa nano nanopa he vaw hnei thai kaw tyh pi ta. He hawhpa Vo pathapa he eima pôhpa anyu viana su liata a y khoh pachaih tyh chuh. He hawhpa pa-ysatuhpa, Fungal zy he noh sa liata laiseih tyh ei ta; a pha kawpa ta mohôh pazaopa a châ lei khiahta la rairuna miah ama taopa tyh. He hawhpa tawhta a vaihna pha chaipa cha mathlai papua hluh theipa chysia a tao lei awpa nata mathlai sy theipa athuthâpa lâchhâh hmâh hluh awpa a châ. He hleikhôta khôtho lâ tawhta nâ vaw di nota na ngai nâ si tyh awpa a châ.