Health & Lifestyle : Pati Nie Khai Tawhta Tao Rai Rai Lei Awpa Zy

Chyhsapa zy heta a daihti ta liata pati nie ta, a mô ta sapa ta â ngiahnazie hawhta a pielyu awpa he eima hnatlâna châta hmo phahnaipa nata pha chaipa a châ tahpa he eima my awpa châ vei. Niebaw phapa eima tahpa liana heta pati phapa - proteins, carbohydrates, châh-ao châta phapa fats (thawhpa lâchhâh), vitamins, minerals nata ti zy he a hlao ta. Henahzy heta eima pati niepa cha a châna awpa hawhta chariehpazaopa ta, sapa châta hmophapa a pie papua tyh. Châhrasala, he hawhpa zydua he nie hra ei sihla, Pati nie khai tawhta he ary liata eima palâsapa zy he eima tao tyhpa a châ deikua khiahta la, niebaw phapa eima niepazy cha hraoleipa deita ama châ aw. Chavâta he pati na nie khai tawhta he ary liatapazy he vaw tao bohbi kha y:

1. Châhnamei pazy lei awpa :

Scientist-zy ta amâ chupasiana tawhta ama hmôpapuapa cha, pati nie khai tawhta châhnamei (Cigarette) pazypa he sâpa/pôhpa châta chi â chhih ngaita kaw ta, sapa/pôhpa zydua parao thei ta, pati nie khai tawhta châhnamei pazypa heta eikha ta châhnamei sôh 10 pazypa nahta a raihriana dâh â lyu thlâh ha. He hleikhôna heta, châhnamei pazypa heta rih a pakâ thei. Pati eima niepa chariehpaituhpa (Digestive System) he eima pôhpa pachiahpa zydua liata raihria ta, châhnamei liata châmaih a ypa nicotine heta eima thisaih (blood) liata Oxygen a sy tyh. He vâna heta pati nie khai tawhta châhnamei pazypa heta pavyh (bowel) cancer nata pachao (lung) cancer a tlôkhei theipa a châ.

2. Pati nie khai tawhta Thopi doh lei awpa :

Pati nie khai tawhta thopi na doh khiahta cha, na pati niepa na pavyhta a chariehpazao awpa kha na pabua ha tahna a châ. He he a chhâpa cha thopi nata Coffee liana heta (chemical tannin) y ta, he heta eima thisaih lâta sie awpa Iron kha a pabua tyh. He vâna heta pati nie khai (a pachaihpa ta zâlâ pati) tawhta thopi dopa he pha chai vei.

3.  Thei lâchhâh nie lei awpa

Tho theipazy he sapa châta nie awpa phapa a châ tarawpa ta, my pati nata zâ pati nie khai tawhta niepa deikua pha chai hlei vei. Pati nie khai dyuta tahpa liata tho theipa niepa heta, eima pati niepa, eima pavyh liata vaw y chiehpazy nahta a pahlaopahlipa ta, pavyhta vaw chariehpazao khao leipa ta, eima pavyh liata thuzao ta, pavyh châta rairhia a pabua tyh. Py ypahâh leipa tlyma, pathisahpa (heartburn) tlyma, pa-uapa (burping) tlyma nata pati nie khai tawhta py y pahâh leina tlyma na hnei khiahta la – nie khai tawhta tho thei nie chi ta, na pavyhta a pahnie khao leipa vâta a châ thei.

 

4. A mô/zia lei awpa

Pati nie khai tawhta a zia/mô lei awpa he cha na chhôhkhanah chhaota ama cha chho tyh cheingei aw. Massachusetts Institute of Technology ta amâ chupasiana liata cha, pati nie khai tawhta a môpa pha lei zie ama hmô papua. Pati nie khai patawnah tan â mô khiahta cha, na pôhpa khata na pavyhta pati na niepa chariehpazao awpa ta rai a hriapa pakhâ thei ta, he heta pavy pasana tlyma, athata â hrina tlyma tlôkhei thei ta, he heta ‘Stroke’ a tlôkhei thei.

5. Ngai a si lei awpa

Nâ ngai nâ si nona heta, na ti hmâpa (A chakua ma a lalôh ma) reizie tan a pôhpa lalôhna/chakuana (Temperature) â nano tyh. Na pôhpa liata ti nâ zâ baopa khata, na lathli ta na pôhpa lalôhna/chakuana avaw nanopa cha na vo lâ thlai na za pahnosapa ta, cha chata na thisaih ta na pôhpa lalôhna/chakuana a kohki thei n’awpa ta thisaih avaw raiparuah tyh. Ti chakuapa na hmâh khiahta cha, na thisaih siena kha avaw kawh via ha tyh. He he achhâpa cha na pôhpa ta lalôhpa â ngiahpa a piepa a vaw hluh tu ha na ta, kha lalôhpa papuana awpa châna khata avaw kawh tyhpa a châ. He heta na thisaih khan a vo lâ athata pasiesa tyh ta, pavyh liata pati na niepa chariehpazao awpa ta baotuh chaipa, thisaih kha ano leipa lâta a sie ha tyh tahna a châ.