Mara Chanô hryta MDC atlyhpatloh (Elected) tua chaipa Pihnô Ngôny Hlychho

Khizaw asosâh lymâ ta, Mara chanô zy chhao atahmâ cha ama duasu he chapaw nahta amâ nanona y khao vei. Achuna kyh liata chhao rai, nietluana kyh liata chhao rai, chapaw hlâta chanô he amâ sâh via ha bâ khiahma tah awpa a za châ ha bâ. Cha nota deikua, râh ryureina, POLITICS liata deikua Mara chanô hmi hmô awpa chyh kaw chy ta, Mara chanôzy ta he kyh liana heta keih ama chakâ bâ hr’awpa he hmo peimawh kawpa a za châ.

Mara chanô hry liata MDC atlyh patloh tua chaipa, Pihnô Ngôny Hlychho-ta ano thâtih a reipa duah vaw reih hra tua :

“Ei moh cha Ngôny Hlychho a châ. Keima Paw cha Poi-Lakher Regional Council founder nata Saikao, Beipa Chhôhmô Hlychho a châ. Keima nô deikua Bualpui (Ng) Beipa Ngunlinga Chinzah, Sawchanô Suinaki Chinzah- Seinâ Chozah a châ. Ano he Krizyhpa Nô Py (KNP) founder a châ hra. Ei utahpa Vâlua Hlychho chhao he Mara Thyutlia Py (MTP) Founder a châ hra. Kô 1929 kô liata Saikao khih liata ei pih. Atahmâ he kô 87 ei châ. Keima he Mission School, Saikao liata Py 6 na taihta châ ei chu. Eima Missionary Pihnô Margaruite Tlôsai Lorrain (Vaili Nô) ta châ eina pachu hmâ. Atahmâ cha kha hlâta ei viasa pha kawpa nah zy ta, eina thisai khai bâ ei. Ei palôh zy âlie kaw tyh ta, thi bâ awpa zy chhao BYU kawna daihti ei hnei tyh.

Mararâh cha Khazopa ngiachhiena nata kyhpachâna vâta nata Mara Freedom Party zy hria pasana vâta ryureina no-eihpa Mara Autonomous District Council piepa vaw châ pita, Py (Poi) nah nata anoeihpa ta Ryureina eima vaw hnei haw. Kô 1972 pa liata Ryureina no-eihpa piepa eima vaw châ tawhta Election tuahchaipa hneipa a châ. Saikao Bia liata Mara Freedom Party tawhta candidate Tao theipa a vaw châ khaoleipa vâta, Saikao MDC Bia cha a khopa mai ta âpie thei awpa ta pahypa a vaw châ. Chanô ei châ taraw pata, Mara Ryureina Opi liata khâchâ a hlao hra awpa kho na ta, Saikao Constituency tawhta Nomination ei vaw file hra. Khazopa ngiachhiena vâta, chanô ei châ taraw pata Election Result vaw phuah ei ta keima cha pahniena ei vaw to haw. Mara chanô tawhta MDC elected tuahchaipa ei vaw châ. Khazopa lâta alynabie ei reih hmeiseih.

Keimo zy MDC châno ta cha, motor tlyma nata hlao hluh kawpa zy kha piepa châlei pita, anodeikuah ei bia (constituency) kha ei chahlôh ho khaw. Ei bia liata ei daihti hluh viapa ei hmâ tyh.Nie paruna zy chhochhi a y Zie hmata pahno pha m'pi. Sawkhâ ta tao awpa maniah a tahpa mai ngâchhi kaw pata eima tao tyh. Politics kha viari thôna châta hmâ ngai hra m'pi. Kha daihti nota Politics zy khala a vaw pathai kaw.

Atahmâ cha Khazopa ngiachhiena vâta Marasaw a viapachaipa ta Mara Chanô zy eima duahsu pha kaw bâta, kao totie liata Chapaw nah zy taotheipa maihta eima taothei hrapa ta ei pahno. Vâduachhi kawpa ta Mara chanô zy he eima riah ma chhie haw tly? Ei pachâna hlâta politics liata eimâ nai kaw chy. Kô 1972 pa liata MDC a tlyhpatlopa ei châ hapa tlaita atanoh taihta Mara chanô zy party candidate chhao hmata eima châ thei mâhleipa he a pei kaw. Anodeikuah eimâ kaw hra lymâ aw tahpa he khâchâ ei ngiapâ.

Eima kô zy kaw uthei lymâ ta, eima pahnona zy chhao alei lymâ ha bâ. Marasaw a hluh viapa zy ta, Mara chanô tawhta MDC elected tuah chaipa ei mo ei padeih thlâpa zy he nâ pahnoleipa ama hluh via thlyu aw. MADC tawhta chhao pahnokheina tlyma nata apakyhpaziahna chhao khâpa hma dao mâh vana. Ei vaw thi khô lâta la Marasaw zy heta einâ vaw thei thlyu hra aw ei ta ei pangiasa.

Khazohpa ta Mara Chi nata Pho cha RA. Lorrain zy nôvah hmâpa ta maniah pabohsa ha ta, eima thyutliana zy siana zawzi ta he Mara pho he leidia leipa aw ta, he hlâta pho rôhnah viapa liata chhao eimâ kaw duah aw tahpa he khâchâ ei ngiapâ. Keima zy hawpa tlai, nâ vaw thei ei chi ta, einâ pakyhpa vâ ei chi ta, a rônah tah na ta ei châly ngâsâ ei”. ~ Mrs. Ngôny Hlychho

(He he târi Noh 17 January 2017 liata Pinô Ngôny Hlychho he a sawchanô (Bara Nô) O liata Facebook liata Page miakha, 'Humans of Maraland'-Admin-zy ta ama kaw pakyhna liata a reipa a cha.)

Biehnawh : Admin @Humans Of Maraland FB Page